İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 413 Hüküm no: 360 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosta v. Peraşkova’nın, adı geçen kasab gediği hisselerini, Sava v. Kiziro’ya devrettiği Kasab ferâğı Ma‘rûz Hudâvendigâr-ı esbak cennet-mekân firdevs-âşiyân Sultân Abdülhamid Han -tâbe serâhu- hazretleri evkāf-ı şerîfelerinden Yedikule hâricinde kâin gayrı-ez selhhâne-i mîrî on aded ganem selhhânelerinden birinci selhhâneye merbût Fındıklı’da bir bâb ve üçüncü selhhâneye merbût Tophâne’de Firuzağa’da bir bâb ve Galata Sarayı kurbünde selhhâne civârında bir bâb ve Fındıklı’da köşe başında bir bâb ve dört yol ağzında bir bâb ve Karaki kurbünde bir bâb ve Beyoğlu’nda Ketehorya mahallesinde bir bâb ve Ağa Câmi‘i kurbünde bir bâb Yazıcı Câmi‘i kurbünde bir bâb dördüncü selhhâneye merbût Galata Sarayı kurbünde bir bâb ki cem‘an on bâb dükkân gediklerinin her biri yirmişer sehm i‘tibârıyla birer sehm-i şâyi‘ine bâ-temessük mutasarrıf olan Kosta v. Peraşkova zimmî tarafından husûs-ı âtîde vekîl olduğu kasab esnâfından Mehmed Said b. el-Hâc Hasan ve Mehmed b. Mustafa nâm kimesneler şehâdetleriyle sâbit olan es-Seyyid Halil b. es-Seyyid Halil meclis-i şer‘-i münîrde Sava v. Kiziro zimmî muvâcehesinde kasablar kethudâsı el-Hâc Hasan Ağa hazır olduğu hâlde takrîr-i kelâm edip ber-vech-i muharrer müvekkilim mersûmun mutasarrıf olduğu birer sehm hisse-i şâyi‘a-i mezkûreleri bâ-hüsn-i rızâ ve tayyib-i hâtır ve ferâğ-ı kat‘î-i mu‘teber ile bedel-i ma‘lûm ve makbûz mukābelesinde bi’l-vekâle mersûm Sava zimmîye ferâğ ve tefvîz ve vech-i lâyıkı üzre teslîm eylediğimde ol dahi ber-vech-i muharrer tefevvüz ve kabûl etmeğin fîmâ-ba‘d zikrleri mürûr eden birer sehm hısas-ı mezkûre re’y-i mütevellî ile mersûm Sava zimmînin dâhil-i havza-i tasarrufu olup müvekkilim mersûmun alâkası kalmamışdır deyü ba‘de’t-takrîr ve’t-tasdîk sâlifü’z-zikr on bâb dükkân gediklerinin her birinden yirmişer sehm i‘tibârıyla birer sehm-i şâyi‘i müvekkil-i mersûmun ferâğından defter-i vakf-ı şerîfde mesfûr Sava zimmî uhdesine kayd ile yedine temessük i‘tâsını istid‘â eyledikleri İstanbul Mahkemesi’nden huzûr. Fî-gurreti B sene 1242