İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 414 Hüküm no: 361 Orijinal metin no: [68b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Filibos’un tütüncü gediğini, Zeliha bt. Hasan’a sattığı Tütüncü gediği mübâya‘ası ve nakli Ma‘rûz Sâdır olan fermân-ı âlîlerine imtisâlen işbu arzuhâl ve derkenâra ba‘de’n-nazar İstanbul’da Defterdâr kapısı karşısında tütüncü esnâfından Filibos zimmî ismine mukayyed şurût-ı nizâma dâhil ve mu‘teber bir bâb tütüncü dükkânı derûnunda mevcûde gedik ta‘bîr olunur bir peşkün ve bir terâzi ma‘a-derâhim ve dört kâse ve iki huni ve sâir âlât-ı lâzıme-i ma‘lûmenin tedâvül-i eydî ile el-yevm şirâen mâliki idüğü bi’l-ihbâr mütehakkık olan es-Seyyid Mustafa Râsim Efendi b. es-Seyyid Halil meclis-i şer‘-i münîrde İstanbul’da Firuzağa mahallesinde sâkine sahibe-i arzuhâl mu‘arrefetü’z-zât Zeliha bt. Hasan nâm hatun mahzarında esnâf-ı merkūme kethudâsı Osman Ağa ve vekîli es-Seyyid el-Hâc Mustafa Ağa ve yazıcısı es-Seyyid Mehmed Nuri Efendi ve yiğitbaşısı Molla Osman ve sâir lonca ihtiyârları hazır oldukları hâlde takrîr-i kelâm edip ber-vech-i muharrer mâlik olduğum âlât-ı gedik-i mezkûru tarafeynden bi’l-îcâb ve’l-kabûl bâtten ve sahîhan bi-safkatin vâhidetin üç yüz elli guruş semen-i makbûza mezbûre Zeliha Hatun’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûrda benim alâkam kalmayıp merkūme Zeliha Hatun’un mal-ı müşterâsı ve hakk-ı sırfıdır deyü ba‘de’l-ikrâr ve’t-tasdîk dükkân-ı mezkûru mülk sahibi eşedd-i lüzûmuna binâen menziline ilâve ve idhâl edip ol vechile âlât-ı gedik-i mezkûrun şurût-ı nizâmına tatbîkan kurb ve civârında vâki‘ âhar gedikden hâlî bir bâb dükkâna mutasarrıfının re’y ve rızâsıyla nakli lâzım geldiğinden bahisle âlât-ı gedik-i mezkûrun kurb ve civârında At Meydânı kurbünde Firuzağa Câmi‘-i şerîfi karşısında kâin sülüs hisse-i şâyi‘ası hazır bi’l-meclis Ahmed Ağa’nın ve selâse-i erbâ‘ı kendinin bâ-temessük-i mütevellî bi’l-icâreteyn tasarruflarında olan âhar gedikden ârî bir bâb vakıf dükkâna hâzır-ı mezbûrun izin ve rızâsıyla nakl ve ismine tashîhan kayd ile yedine sûret i‘tâsını mezbûre Zeliha Hatun istid‘â ve ber-vech-i muharrer nakli şurût-ı nizâma muvâfık olduğunu esnâf-ı hâzırûn-ı mezbûrûn ihbâr ve inhâ etmeleriyle bu sûretde zikrolunan tütüncü gediği âlâtı sâlifü’z-zikr Defterdâr kapısı karşısında olan dükkândan mârrü’z-zikr Firuzağa Câmi‘-i şerîfi karşısında olan dükkâna nakl ile mersûm Filibos zimmî [69a] ismine olan kayd-ı atîki ref‘ ve terkīn ve el-yevm mâlikesi mezbûre Zeliha Hatun ismine tashîhan kayd ve zabtı’çün kaleminden sûret i‘tâsı muktezâ-yı şurût-ı nizâm idüğü İstanbul Mahkemesi’nden huzûr. Fî 23 min-Şevvali’l-mükerrem sene 1242