İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 415 Hüküm no: 362 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Hazer’in veresesinin, değirmen gediği hisselerini Avakim v. Nikogos’a devrettikleri ve gediğin nakli Uncu değirmeni mübâya‘ası ve nakli Ma‘rûz Âsitâne-i aliyyede vâki‘ habbâz esnâfından olup bundan akdem hâlik olan Kirkor v. Hazer zimmînin sulbî kebîr oğulları ve hasran vârisleri idüğü bi’l-ihbâr mütehakkık olan Kazer ve Mardiros zimmîler meclis-i şer‘-i münîrde Avakim v. Nikogos zimmî muvâcehesinde her biri takrîr-i kelâm edip mahrûse-i Galata’da Sepetçiler içinde vâki‘ el-yevm bir horoslu bir kıt‘a uncu değirmeni derûnunda mevcûde beyne’l-esnâf gedik ta‘bîr olunur dört re’s bargir ve sâir âlât-ı lâzıme-i ma‘lûmenin nısf-ı şâyi‘i babamız mesfûr Kirkor zimmînin ve nısf-ı şâyi‘-i âharı dahi Sahak v. Abraham zimmînin yedlerinde iştirâken ve şâyi‘an mâlları iken babamız mersûm hâlik oldukda nısf hisse-i mezkûresi hasran bize <> ve mersûm Sahak zimmî dahi bundan akdem hâlik oldukda nısf hisse-i mezkûresi hasran sulbî kebîr oğlu hazır bi’l-meclis Lorsik zimmîye mevrûs olmuşdu el-hâletü hâzihî bizi vech-i muharrer bi’l-irsi’ş-şer‘î mâlik olduğumuz nısf hisse-i mezkûreyi tarafeynden bi’l-îcâb ve’l-kabûl ve bâtten ve sahîhan bi-safkatin vâhidetin mersûm Avakim zimmîye sekiz yüz altmış guruş semen-i makbûza bey‘ ve temlîk ve vech-i lâyıkı üzre teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-i âm ile ibrâ ve ıskāt ve her birimiz ber-vech-i muharrer âharın ibrâsını kabûl eyledik fîmâ-ba‘d nısf-ı âlât-ı gedik-i mezkûr mesfûr Avakim zimmînin mülk-i müşterâsı ve hakk-ı sırfı olup bizim alâkamız kalmamışdır deyü ba‘de’t-takrîr ve’t-tasdîk mersûmân Avakim ve Lorsik zimmîler meclis-i şer‘-i münîrde esnâf-ı merkūme kethudâsı Abdülbaki Ağa ve nizâm ustaları hazır oldukları hâlde takrîr-i kelâm edip ber-vech-i muharrer ırsen ve şirâen mâlikleri olduğumuz ikişer bargirden cem‘an dört re’s bargir ve sâir âlât-ı ma‘lûmeyi mahrûse-i mezbûrede eski Yağkapanı hâricinde Makaracılar içinde kâin bi’l-iştirâki’s-seviy mâlikler olduğumuz bir horoslu bir kıt‘a uncu değirmenine nakl ile mahâll-i sâbık ve ism-i evvelinin kaydları ref‘ ve terkīn ve değirmen-i sânî-i mezkûr iki horoslu olarak her birimiz mâlik olduğumuz birer horoslu zabtı’çün yedimize başka başka iki kıt‘a sûret i‘tâ buyurulması niyâzımızdır deyü istid‘â ve istirhâm eylediklerinde hâl minvâl-i muharrer üzre olup âlât-ı gedik-i mezkûr hâlikân-ı mesfûrânın ber-vech-i muharrer sağlıklarında yedlerinde mâlları idüğünü ve ba‘de’l-helâk evlâdı mesfûrûna hasran mevrûs olduğunu ve bu makūle horos nakli şurût-ı nizâmlarına muvâfık olduğunu kethudâ ve nizâm ustaları hâzırûn-ı merkūmûn dahi ihbâr ve inhâ eyledikleri ma‘lûm-ı devletleri buyruldukda istid‘âlarına müsâ‘ade-i seniyyeleri erzân buyurulup sâlifü’z-zikr Sepetçiler içinde olan bir horos uncu gediği sâbıku’z-zikr Makaracılar içinde olan bir horoslu uncu değirmenine nakl ile mahâll-i sâbık ve ism-i evvelinin kaydları ref‘ ve terkīn ve değirmen-i sânî-i mezkûr iki horos olarak her birinin mâlikleri oldukları birer horosun zabtı’çün kaleminden yedlerine başka başka iki kıt‘a sûret i‘tâsı bâbında fermân-ı âlîleri sudûru muktezâ-yı nizâm idüğü İstanbul Mahkemesi’nden huzûr. Fî 21 min-Şevvali’l-mükerrem sene 1242