İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 417 Hüküm no: 364 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolancılar Çarşısı’nda yangında zarar gören 37 dükkânın tamir masraflarını esnafının aralarında paylaştıkları Çarşı’da Bezzâzistân civârında kolancı ve şeridci ve bükmeci dükkânları ta‘mîri masrûfundan bâkī 2590 buçuk guruş iki parayı edâya ta‘ahhüdleri Ma‘rûz İstanbul’da Çarşı-yı Kebîr’de Bezzâzistân-ı atîk ebvâbından Fincâncılar Kapısı hâricinde Kolancılar Çarşısı demekle meşhûr sûkun tarafeyninde kâin Dârü’s-sa‘âdeti’ş-şerîfe ağası hazretleri nezâretlerinde mahmî evkāfdan Ayasofya-i Kebîr Vakfı müsakkafâtından bezzâzistân-ı mezkûr tarafında sekiz aded ve karşı tarafında on bir aded ki cem‘an on dokuz aded kemer tahtlarında vâki‘ birbirine muttasıl ma‘lûmü’l-hudûd otuz yedi bâb dekâkînin gedik mâlikleri olan kolancı ve kılabdancı ve şeridçi ve bükmeci ve simkeş ve kîseci esnâfından mazbûtü’l-esâmî ehl-i İslâm ve re‘âyâ kullarının Bâb-ı Âlî’ye takdîm eyledikleri işbu bir kıt‘a aruzhâlleri bâlâsına bu dâ‘îleriyle Haremeyn-i şerîfeyn müfettişi fazîletlü efendi ve ihtisâb ağası ve mi‘mâr ağa bendelerine hitâben sâdır olan fermân-ı âlîlerine imtisâlen kolancı esnâfından olup kendi nefsinden asîl ve vâlidesi Şerife Âişe bt. es-Seyyid Ali nâm hatun tarafından husûs-ı âtîde vekîl-i sâbitü’l-vekâlesi es-Seyyid Hasan Efendi b. el-Hâc Hüseyin nâm kimesne bi’l-ma‘iyye rü’yete me’mûr Haremeyn-i şerîfeyn müfettişi olup İstanbul pâyesiyle tekrîm [69b] buyrulan zâde-i Emin Paşazâde fazîletlü mîr Abdülkadir Efendi tarafından meb‘ûs Kâtib Muhammed Hamdi Efendi ve ihtisâb ağası Mustafa Ağa tarafından mürsel Mehmed Rifat Ağa ve hâssa mi‘mârı tarafından mürsel Selim Sâbit ve Mehmed Râşid Halîfeler ile yine kolancı esnâfından olup kendi nefsinden asîl ve kız karındaşı Ümmü Gülsüm bt. İsmail nâm hatun tarafından kezâlik husûs-ı âtîde vekîl-i sâbitü’l-vekâlesi İbrahim Nuri Ağa ibnü’l-mezbûr İsmail ve kezâlik kendiden asîl ve vâlidesi Şerife Emine bt. es-Seyyid Mehmed nâm hatun tarafından kezâlik husûs-ı âtîde vekîl-i sâbitü’l-vekâlesi es-Seyyid Osman Ağa b. Ahmed nâm kimesneler hazır oldukları hâlde meclis-i şer‘-i münîrde Kolancı Lütfullah Ağa b. Osman ve zâtları mu‘arrefe Kolancı Süleyman Ağa zevcesi Şerife Fâtıma bt. Ali ve Şerife Fâtıma bt. Sırmacı es-Seyyid el-Hâc Mehmed Ârif nâm hatunlar ile şahsı mu‘arrefe Altıncı Manak zimmî zevcesi Serpohi bt. İstefan Nasrâniye asâleten ve Kolancı el-Hâc İbrahim Ağa b. Hüseyin’in oğlu ve tarafından vekîl-i sâbitü’l-vekâlesi Kolancı es-Seyyid Ebûbekir Ağa ve Çukadâr Salih Ağa b. Abdullah tarafından kezâlik husûs-ı âtîde vekîl-i sâbitü’l-vekâlesi Çukadâr Dâ‘î Mustafa Ağa b. Ahmed muvâcehelerinde kolancı esnâfının kethudâsı Ali Ağa b. Hüseyin ve esnâfından es-Seyyid el-Hâc Mahmud Ağa b. Ali ve Eyûbî İsmail Ağa b. Mustafa ile zâtları mu‘arrefe Kılabdancı es-Seyyid Mustafa Şükrü Efendi zevcesi Zeliha nâm-ı diğer Hub-edâ Hatun bt. Abdullah ve Kara Lambo v. İstilyanos ve Astarcı Almiye v. Yuvakim ve Simkeş Hürmüz v. Arutin ve Kılabdancı Gelibolulu Andon v. Artin ve Şeridci İstepan v. Bağdısar ve Kılabdancı Kocasar oğlu Avanes v. Artin ve Bükmeci Karabet v. Peçen ve Şeridçi Agop v. İstefan ve Kîseci Mardiros v. Tavit ve Sarrâf Altun oğlu Agop v. Artin zimmîler ile Şalcı Yuda v. Hayim Bovilve Frenk dellâlı Naim v. Mosi Zonana Yahûdiler asâleten ve Şerife Sâliha bt. Mehmed nâm hatunun vâlidesi ve tarafından vekîl-i sâbitü’l-vekâlesi zâtı mu‘arrefe Şerife Hadîce bt. es-Seyyid Ali ve Sarrâf Minase v. Karabet zimmî tarafından husûs-ı âtîde vekîl-i sâbitü’l-vekâlesi Kîseci Mıgırdıç v. Setrak ve Kılabdancı Mumcu oğlu Kigork v. Matos zimmî tarafından kezâlik husûs-ı âtîde vekîl-i sâbitü’l-vekâlesi Kılabdancı Haffâfı Topkapılı Haçador v. Artin ve Maryem bt. Ohannes Nasrâniye tarafından kezâlik husûs-ı âtîde vekîl-i sâbitü’l-vekâlesi Kîseci Nişan v. Arakil zimmîler hazır oldukları hâlde bundan akdem bi-kazâillâhi te‘âlâ vukū‘ bulan harîkde Çarşı-yı Kebîr’de vâki‘ bâlâda mezkûr Kolancılar sûkunda olan on dokuz aded kemerler tahtlarında kâin otuz yedi bâb kârgir dekâkîn ile sûk-ı mezbûrun kemerleri ba‘zan münhedim ve ba‘zan mâil-i inhidâm olup dekâkîn-i mezkûrenin gedik mâlikleri taraflarından ta‘mîr ve tecdîdi bâbında sudûr eden emr-i âlî-şâna imtisâlen ben hâzırân-ı mezbûrân İbrahim Nuri Ağa ve es-Seyyid Osman Ağa ile ma‘an otuz yedi bâb dekâkîn ile sûk-ı mezbûrun kemerlerini gedik mâliklerinin hisselerinde bi-şartı’r-rücû‘ emrleriyle mâlımızdan ta‘mîr ve tecdîd-birle tekmîl edip bu def‘a ma‘rifet-i şer‘ ve mûmâ-ileyhimâ ihtisâb ağası ve mi‘mâr ağa ma‘rifetleriyle keşf ve misâha olundukda masrûfumuz ber-mûcib-i defter-i keşf yirmi dokuz bin dört yüz doksan dokuz buçuk guruşa bâliğ ve meblağ-ı mezkûr ta‘dîl ve tesviye üzre taksîm olundukda benimle vâlidem müvekkilem mezbûre Şerife Âişe Hatun’un hissemize isâbet eden üç bin iki yüz yetmiş sekiz buçuk guruş iki para ve hâzır-ı mezbûr İbrahim Nuri Ağa ile kız karındaşı müvekkile-i merkūme Ümmü Gülsüm Hatun’un hisselerine isâbet eden iki bin dört yüz seksen bir buçuk guruş bir para ve hâzır-ı mezbûr es-Seyyid Osman ile vâlidesi müvekkile-i merkūme Şerife Emine Hatun’un hisselerine isâbet eden iki bin doksan üç guruş on beş para ki cem‘an yedi bin sekiz yüz elli üç guruş on sekiz para ile hâzırûn-ı asîl ve müvekkilûn-ı merkūmûndan kethudâ-yı mezbûr Ali Ağa’nın hissesine isâbet eden dokuz yüz yirmi beş guruş on beş para ve birâder-zâdesi müvekkile-i mezbûre Şerife Sâliha Hatun’un hissesine isâbet eden üç yüz yirmi iki guruş on beş para ve es-Seyyid el-Hâc Mahmud Ağa’nın hissesine isâbet eden sekiz yüz on bir buçuk guruş sekiz para ve Eyûbî İsmail Ağa’nın hissesine isâbet eden altı yüz doksan beş buçuk guruş on para ve Zeliha Hatun’un hissesine isâbet eden dokuz yüz dört buçuk guruş ve Kara Lambo zimmînin hissesine isâbet eden dört yüz beş buçuk guruş on dört para ve Almiye zimmînin hissesine isâbet eden kezâlik dört yüz beş buçuk guruş on dört para ve Hürmüz zimmînin hissesine isâbet eden beş yüz yirmi bir buçuk guruş on iki para ve Gelibolulu Andon zimmînin hissesine isâbet eden bin dört yüz altı buçuk guruş sekiz para ve İstepan zimmînin hissesine isâbet eden sekiz yüz yirmi buçuk guruş üç para ve Kocasar oğlu Avanes zimmînin hissesine isâbet eden altı yüz seksen sekiz buçuk guruş sekiz para ve Bükmeci Karabet zimmînin hissesine isâbet eden altı yüz seksen sekiz buçuk guruş sekiz para ve Şeridçi Agop zimmînin hissesine isâbet eden bin üç yüz yetmiş yedi guruş on para ve Kîseci Mardiros zimmînin hissesine isâbet eden yedi yüz altmış iki buçuk guruş altı para ve Altun oğlu Agop zimmînin hissesine isâbet eden yedi yüz doksan iki guruş on dört para ve Şalcı Yuda Yahûdinin hissesine isâbet eden altı yüz seksen sekiz buçuk guruş sekiz para ve Naim Yahûdinin hissesine isâbet eden sekiz yüz otuz dört buçuk guruş on altı para ve Sarrâf Minasa zimmînin hissesine isâbet eden dokuz yüz sekiz guruş on dokuz para ve Mumcu oğlu Kigork zimmînin hissesine isâbet eden bin iki yüz seksen yedi guruş dokuz para ve Maryem Nasrâniyenin hissesine isâbet eden bin üç yüz kırk sekiz guruş üç para ki cem‘an on altı bin beş yüz doksan yedi buçuk guruşu dahi hâzırûn-ı asîl ve müvekkilûn-ı merkūmûndan tamamen ve kâmilen ahz ü kabz edip ancak mezbûr Lütfullah Ağa hissesine isâbet eden beş yüz yetmiş dokuz buçuk guruş on iki paranın üç yüz doksan sekiz guruşunu teslîm-birle bâkī zimmetinde yüz seksen bir buçuk guruş on iki para ve Kolancı Süleyman Ağa zevcesi mezbûre Şerife Fâtıma Hatun hissesine isâbet eden dört yüz on yedi guruş on sekiz paranın altmış yedi guruşunu teslîm-birle bâkī zimmetinde üç yüz elli guruş on sekiz para ve mezbûre Şerife Hadîce Hatun hissesine isâbet eden altı yüz doksan üç guruş iki paranın yüz doksan üç guruşunu teslîm-birle bâkī zimmetinde beş yüz guruş iki para ve mersûme Serpohi Nasrâniye hissesine isâbet eden bin dört yüz elli iki buçuk guruş sekiz paranın dört yüz seksen guruşunu teslîm-birle bâkī zimmetinde dokuz yüz yetmiş iki buçuk guruş sekiz para ve müvekkil-i mezbûr Kolancı el-Hâc İbrahim Ağa hissesine isâbet eden altı yüz doksan dört guruş on altı paranın üç yüz altmış guruşunu teslîm-birle bâkī zimmetinde üç yüz otuz dört guruş on altı para ve müvekkil-i mezbûr Çukadâr Salih Ağa hissesine isâbet eden bin iki yüz on bir guruş altı paranın dokuz yüz altmış guruşunu teslîm-birle bâkī zimmetinde iki yüz elli bir guruş altı para ki hâzırûn-ı asîl ve müvekkil-i mezbûrûndan her biri deynleri olan cem‘an beş bin kırk sekiz buçuk guruş iki paranın iki bin dört yüz [70a] elli sekiz guruşunu edâ ve teslîm ve ol vechile min-haysü’l-mecmû‘ yirmi altı bin dokuz yüz sekiz buçuk guruş on sekiz parayı her birimiz istifâ etmemizle bâkī asîl ve müvekkil-i merkūmûn zimmetlerinde kalan min-haysü’l-mecmû‘ iki bin beş yüz doksan buçuk guruş iki parayı merkūmûn Lütfullah Ağa ve el-Hâc İbrahim Ağa ve Salih Ağa ve Şerife Fâtıma ve Şerife Hadîce Hatunlar ile Serpohi Nasrâniyeden bi’l-mürâca‘a hâzırân-ı mezbûrân İbrahim Nuri Ağa ve es-Seyyid Osman Ağa ile ma‘an taleb ederiz deyü hâzırûn-ı asîl ve vekîl-i merkūmûnun tasdîkleriyle da‘vâ ettiklerinde onlar dahi cevâblarında kazıyye minvâl-i meşrûh üzre olduğunu bi-tamamihâ tâyi‘aten ve kat‘iyen her biri bi’l-asâle ve bi’l-vekâle ikrâr ve i‘tirâf ve meblağ-ı bâkī-i mecmû‘-ı mezkûr iki bin beş yüz doksan buçuk guruş iki parayı müdde‘ûn-ı mezbûrûn es-Seyyid Hasan Efendi ve İbrahim Nuri Ağa ve es-Seyyid Osman Ağa’ya vech-i meşrûh üzre edâ ve îfâya asâleten ve vekâleten müte‘ahhidler oldukları İstanbul Mahkemesi’nden huzûr-ı âlîlerine i‘lâm olundu. Fî 15 min-Şevvali’l-mükerrem sene 1242 Gereği gibi mukābele-şüd