İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 420 Hüküm no: 365 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Usta b. Osman’ın, Mehmed Usta b. Mehmed’e 650 guruş borcu olduğu Turşu dükkânı kirâsından ve karzdan 650 guruş hüküm Ma‘rûz Turşucu esnâfından el-Hâc Mehmed Usta b. Mehmed nâm kimesne meclis-i şer‘-i enverde esnâf-ı merkūmeden Mustafa Usta b. Osman muvâcehesinde kethudâları Veliyüddin Ağa b. Mehmed hazır olduğu hâlde mezbûr Mustafa Usta zimmetinde bundan akdem yedimden ve mâlımdan iktirâz ve kabz eylediği dört yüz otuz guruş ile mahrûse-i Galata’ya muzâfe kasaba-i Tophâne’de Ağa Hamamı nâm mahâlde Bakkal İstavri zimmî mağazasına muttasıl taht-ı icâremde olan bir bâb turşucu dükkânı derûnunda mevcûde beyne’l-esnâf gedik ta‘bîr olunur bâ-hüccet-i şer‘iye müstakillen yedimde emvâlim olan sagīr ve kebîr on üç fuçı ve bir sirke fuçısı ve bir terâzi ma‘a-derâhim ve bir akçe tahtası ve bir pîş-tahta ve sâir âlât-ı lâzıme-i ma‘lûmenin senevî yüz onar guruş ecr-i müsemmâsından bin iki yüz kırk senesinde duhûl eden rûz-ı Hızır ibtidâsından kırk iki senesinde duhûl eden rûz-ı Hızır’a gelince iki senede merkūm Mustafa Usta’nın zimmetinde müctemi‘ olan iki yüz yirmi guruş ki cem‘an altı yüz elli guruşu bana edâya ve işbu kırk iki senesinde duhûl eden rûz-ı Hızır ibtidâsında fesh-i akd-i icâre etmemle gedik ta‘bîr olunan âlât-ı lâzıme-i muharrere-i mezkûreyi bana teslîme merkūm Mustafa Usta’ya tenbîh olunmak matlûbumdur deyü da‘vâ ettikde ol dahi cevâbında kazıyye minvâl-i meşrûh üzre olup meblağ-ı mecmû‘-ı mezkûr altı yüz elli guruş zimmetinde müdde‘î-i mezbûra sahîhan deyni olduğunu ikrâr ve i‘tirâf ve meblağ-ı mecmû‘-ı mezkûr altı yüz elli guruş ile gedik ta‘bîr olunan âlât-ı mezkûreyi müdde‘î-i mezbûr el-Hâc Mehmed Usta’ya edâ ve teslîme ta‘ahhüd eylediği İstanbul Mahkemesi’nden huzûr-ı âlîlerine i‘lâm olundu. Fî 16 min-Şevvali’l-mükerrem sene 1242