İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 421 Hüküm no: 366 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yangında zarar gören Kalpakçılarbaşı dört yol ağzı kemerinin tamir masrafının esnafı arasında paylaşıldığı Çarşı’da Kalpakçılarbaşı’nda dört yol ağzı kemeri keşfi Ma‘rûz İstanbul’da Çarşı-yı Kebîr’de Kalpakçılarbaşı nâm mahâlde vâki‘ dülbendci esnâfından Yazıcı Bogos v. Bedros ve Papas oğlu Maniyel v. Kapril nâm zimmîler sâdır olan fermân-ı âlîlerine imtisâlen ihtisâb ağası Dede Mustafa Ağa ve ser-mi‘mâr-ı hâssa Abdülhalim Ağa ve hulefâsından Ahmed Mümtaz ve Abdurrahman Halîfeler hazır oldukları hâlde meclis-i şer‘-i münîrde haffâf esnâfından ve Tuğcular Arastası sükkânından kethudâ es-Seyyid Hasan Ağa b. Hüseyin ve el-Hâc Mehmed Ağa b. Süleyman ve es-Seyyid el-Hâc Mustafa Ağa b. es-Seyyid Ali ve es-Seyyid Süleyman Ağa b. es-Seyyid Abdurrahman ve Sipâh Çarşısı sükkânından es-Seyyid İsmail Ağa b. es-Seyyid İsmail ve Abdullah Ağa b. Abdullah ve sâirleri muvâcehelerinde dülbendci esnâfından Uzun Artin v. Takfor ve Kapril v. Mıgırdıç ve Kasber v. Kirkor ve tuhafçı esnâfından Anaştaş v. Yani ve Agayi v. Andon ve Pandeli v. Kostandi ve Kalpakçı esnâfından Hristo v. Manol ve Yorgi v. Tanaş ve Yosif v. Mihal ve Küçük Kosti v. Yamandi ve Nikoli v. Apostol ve Tanaş v. Yani zimmîler ve sâirleri kezâlik hazır oldukları hâlde bundan akdem bi-kazâillâhi te‘âlâ vukū‘ bulan harîkde Kalpakçılarbaşı caddesinde vâki‘ dört yol ağzının kârgir kemeri bi’l-külliye münhedim olup ancak çarşı-yı mezkûrda kâin dekâkînin gedik mâlikleri kendi mâllarından binâ ve inşâ ve tekmîl etmek üzre beyâz üzerine sudûr eden emr-i âlî-şâna imtisâlen biz sûk-ı mezbûrun kârgir kemerini ber-mûcib-i emr-i âlî esnâf-ı merkūmûnun bi-şartı’r-rücû‘ emrleriyle binâ ve inşâ ve tekmîl edip ba‘dehû ma‘rifet-i şer‘ ve hâzırân-ı mûmâ-ileyhimânın ma‘rifetleriyle keşf ve misâha olundukda mârrü’z-zikr dört yol ağzının kemeri terbî‘an doksan sekiz zirâ‘ beher zirâ‘ı yetmiş altışar guruşdan yedi bin dört yüz kırk sekiz guruş ve moloz nakli’çün bin beş yüz guruş ki cem‘an masrûfumuz sekiz bin dokuz yüz kırk sekiz guruşa bâliğ ve haffâfân esnâfının kırk sekiz bâb dekâkîn gedikleri mâliklerinin hisselerine üç bin altı yüz guruş ve Sipâh Çarşısı ahâlîlerinin yirmi beş bâb dekâkîn gedikleri mâliklerinin hisselerine bin sekiz yüz yetmiş beş guruş isâbet etmiş iken haffâfân esnâfı mezbûrûn fakat yedi yüz elli guruş ve Sipâh Çarşısı ahâlîsi merkūmûn dört yüz guruş ki cem‘an bin yüz elli guruş bi’r-rızâ vermeğe müte‘ahhid olduklarında biz ve sâir yemenîci ve tuhafçı ve kalpakçı esnâfları hâzırûn-ı mezbûrûn dahi râzı ve mâ‘adâsını beynimizde iktisâm etmek üzre müte‘ahhidler olduk dediklerini mezbûrûndan her biri tasdîk ve meblağ-ı mezkûr yedi yüz elli guruşu haffâfân esnâfı ve dört yüz guruşu Sipâh Çarşısı ahâlîsi merkūmûn müdde‘iyân-ı mezbûrâna vermeğe müte‘ahhidler oldukları İstanbul Mahkemesi’nden huzûr. Fî 15 min-Ş sene 1242