İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 423 Hüküm no: 369 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Midillili Aci Natu’nun, sabun nâzırından alacak davasında, Nikola v. Yorgi’nin vekâletinin geçersizliği Vekâlet da‘vâsı men‘i Ma‘rûz Sahib-i arzuhâl Nikola v. Yorgi nâm zimmî meclis-i şer‘-i münîrde arzuhâlde mezkûr sâbıkā Sabun Nâzırı Tiryâkizâde Mehmed Ağa b. Mustafa nâm kimesne muvâcehesinde Midilli cezîresinde mütemekkin zeytin ve sabun tüccârından Aci Natu zimmî beni merkūm Mehmed Ağa ile beynehûmâlarında cârî ahz u i‘tâları hesâbını rü’yete vekîl eylediğinde ben dahi vekâlet-i merkūmeyi kabûl etmemle ol vechile müvekkilim mersûmun hesâbını rü’yet etmek matlûbumdur deyü merkūm Mehmed Ağa’nın inkârına mukārin eylediği vekâlet da‘vâsında müvekkilinin babası ve ceddi isimlerini zikr ve beyân etmek şerâit-i sıhhat-i da‘vâ-yı vekâlet iken mersûm Nikola zimmî zikr ve beyân edemeyip ol vechile tashîh-i da‘vâ edemediği müdde‘î-i mersûm Nikola zimmîye tefhîm ve da‘vâ-yı mezkûresiyle mezbûr Mehmed Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 23 min-L sene 1242