İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 424 Hüküm no: 370 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Feyzullah’ın, kölesinin kaçmasına Bakkal Yani ve Mihal’in sebep olduğu iddiasından vazgeçtiği Gulâm-ı âbık nizâ‘ından ibrâ Ma‘rûz Mültezim tâifesinden sahib-i arzuhâl Eğinli el-Hâc Mehmed Ağa b. Feyzullah tarafından husûs-ı âtîde vekîl olduğu Ahmed Ağa b. Hüseyin ve Hüseyin b. Zeynel nâm kimesneler şehâdetleriyle sâbit olan kasab ustası es-Seyyid Hasan Ağa b. Mehmed meclis-i şer‘-i münîrde derûn-ı arzuhâlde isimleri mastûr Mercan Çarşısı’nda Bakkal Yani v. Tanaş ve Mihal v. Anaştaş zimmîler muvâcehelerinde İstefe üserâsından İslâm’ı kabûl eden orta boylu kara kaşlı kara gözlü tahmînen on dört yaşında üç bin guruş kıymetli Ali nâm bir re’s gulâmımı işbu sene-i mübâreke Ramazan-ı şerîfinin yirmi yedinci günü bir-takrîb tahrîk ve iğfâl ile ibâk ettirdiler deyü müvekkilim merkūm işbu arzuhâli takdîm ve iddi‘â etmişdi lâkin husûs-ı mezkûr taharrî ve tecessüs olundukda zimmiyân-ı mersûmânın bir gûne medhalleri olmadığı zâhir ve müvekkilim merkūmun dahi meczûmu olup da‘vâ-yı mezkûresinden fâriğ olmağla bi’l-cümle husûs-ı mezkûra ve sâir cemî‘ hukūk-ı şer‘iyeye müte‘allika âmme-i de‘âvî ve mutâlebât ve kâffe-i eymân ve muhâsamâtdan mesfûrân Yani ve Mihal zimmîlerin zimmetlerini şurût-ı müfsideden ârî ve uhûd-ı mubtıladan berî cebr ve kerhden hâlî ibrâ-i âmm-ı sahîh-i şer‘î ve ıskāt-ı tâmm-ı sarîh-i mer‘î ile bi’l-vekâle ibrâ ve ıskāt eylediğimde onlar dahi ibrâ-i mezkûru kabûl eylediler deyü takrîrini zimmiyân-ı mersûmân tasdîk eyledikleri İstanbul Mahkemesi’nden huzûr-ı âlîlerine i‘lâm olundu. Fî 3 min-Za sene 1242