İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 425 Hüküm no: 371 Orijinal metin no: [70b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusyalı Kostantin v. Perasino’nun, Foti v. Dimitri’nin altınlarını çaldığını iddia ettiği 9640 guruşluk ecnâs-ı altın men‘i Ma‘rûz Derûn-ı takrîrde mersûmu’l-ism Rusyalı Kostantin v. Perasino nâm müste’men Çarşamba günü Arz Odası’nda huzûr-ı ma‘delet-nüşûr-ı sadâret-penâhîlerinde tercümanı Pizani hazır oldukları hâlde akd olunan meclis-i şer‘-i münîrde Foti v. Dimitri nâm zimmî muvâcehesinde liman-ı hümâyûn yazıcısı Köse oğlu Yanko zimmî delâletiyle mesfûr Foti zimmî mukaddemâ hizmetkârım iken işbu sene-i mübâreke Ramazan-ı şerîfi evâsıtında Galata’da Kurşunlu Mahzen kurbünde Makaracılar içinde kâin odamda mevcûd mukaffel sandığımı bir-takrîb küşâd ve derûnunda mevzû‘ mâlımdan mecmû‘u dokuz bin altı yüz kırk guruşa mu‘âdil iki yüz altmış aded Mahmudiye nısfiyesi altmış beş aded Adlî ve dört Macar ve yirmi beş aded riyâl ve on beş cihâdiye ve bir fındık rub‘iyesini hufyeten almağla nukūd-ı mezkûre mevcûde ise aynılarını müstehleke ise misillerini mersûm Foti zimmîden taleb ederim deyü da‘vâ ettikde ol dahi külliyen inkâr etmekle müdde‘î-i müste’men-i mersûm da‘vâ-yı mezkûresini isbâta kādir olamayıp tahlîfe dahi tâlib olmamağın bu sûretde ber-muktezâ-yı şer‘-i şerîf kavl-i mücerrediyle bir nesne lâzım gelmediği tercümanı ma‘rifetiyle müste’men-i mesfûra tefhîm ve da‘vâ-yı mezkûresiyle mersûm Foti zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 7 min-Za sene 1242 [Beyaz Beyaz]