İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 425 Hüküm no: 372 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Habib’in, Dumni bt. Nikola’ya verdiği borç karşılığında devraldığı evini, kalan meblağın edasından sonra iade edeceği 250 guruşu ba‘de’l-kabz vakıf arsayı geri ferâğa ta‘ahhüd Ma‘rûz Sahibe-i arzuhâl şahsı mu‘arrefe Dumni bt. Nikola nâm Nasrâniye bi’l-ma‘iyye rü’yete me’mûr nezâret-i hazret-i sadâret-penâhîlerinde âsûde evkāf müfettişi mevâlî-i ızâmdan fazîletlü es-Seyyid Ahmed Efendi tarafından mürsel Kâtib Abdurrahim Efendi dâ‘îleri ma‘iyyetiyle akd olunan meclis-i şer‘-i münîrde derûn-ı arzuhâlde mezkûru’l-ism mu‘arrefetü’z-zât Emetullah bt. Habib nâm hatun muvâcehesinde zîr-i nezâret-i âsafânelerinde âsûde evkāfdan merhûm Kürkçübaşı Süleyman Ağa Vakfı’nın kāimmakām-ı mütevellîsi el-Hâc Mehmed Sâdık Ağa b. İbrahim hazır olduğu hâlde vakf-ı mezkûr müstagallâtından İstanbul’da Kumkapı kurbünde Muhsinehatun mahallesinde kâin bir tarafı İstirati zimmî menzili ve bir tarafı kenîse ve tarafeyni tarîk-ı âm ile mahdûd beher şehr yüz akçe icâre-i müecceleli bâ-temessük-i mütevellî bi’l-icâreteyn mutasarrıfe olduğum bir bâb menzilimi bin iki yüz otuz dört senesi Muharreminin on beşinci günü mezbûre Emetullah Hatun’un mâlından ve yedinden karz aldığım iki bin beş yüz guruş deynim mukābelesinde vefâen ferâğ eder olduğumda ben deyn-i mezkûrumu her ne zaman mezbûreye edâ eder isem ol dahi menzil-i mezkûru yine bana red ve ferâğ etmek şartıyla bâ-re’y-i mütevellî mezbûre Emetullah Hatun’a ferâğ ve tefvîz ve teslîm eylediğimde ol dahi şart-ı mezkûr ile tefevvüz ve kabûl ettikden sonra ben deyn-i mezkûrun bin beş yüz guruşunu mezbûreye nakden edâ ve teslîm eylediğimden mâ‘adâ deyn-i mecmû‘-ı mezkûr için târih-i mezbûrdan işbu târihe gelince bilâ-devr nemâ olarak ceste ceste iki bin beş yüz guruş vermemle nemâ-i mezkûrun bin guruşu bâkī kalan bin guruş deynime mahsûb olunup ziyâdesi olan bin beş yüz guruşu menzil-i mezkûr muhterik olduğundan arsasını yine bana red ve teslîme merkūme Emetullah Hatun’a tenbîh olunmasını da‘vâ eylediğimde ol dahi cevâbında sen menzil-i mezkûru makbûzun olan meblağ-ı mezkûr iki bin beş yüz guruş bedel mukābelesinde bâ-izn-i mütevellî kat‘iyen bana ferâğ etmişdin deyip mâ‘adâ müdde‘âlarımı inkâr ve ol vechile beynimizde ba‘de vukū‘ı’l-münâza‘a beynimiz ıslâh ve te’lîf olunup ben ber-vech-i muharrer istirdâd-ı ribâ müdde‘âsından meccânen fâriğa olduğumdan mâ‘adâ alâ-tarîkı’s-sulh mâlımdan dahi iki yüz elli guruş vermeğe ta‘ahhüd eylediğimde ol dahi ancak ferâğ bi’l-vefâ müdde‘âmı tasdîk edip meblağ-ı merkūm iki yüz elli guruşu ba‘de’l-kabz arsa-i mezkûreyi şart-ı mezkûra binâen bâ-re’y-i mütevellî geri bana red ve ferâğa ta‘ahhüd etmekle meblağ-ı merkūm iki yüz elli guruş ile arsa-i mezbûreden mâ‘adâ bi’l-cümle husûs-ı mezkûrlara ve sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü takrîrini mezbûre Emetullah Hatun tasdîk ve bu vechile kat‘-ı nizâ‘ eyledikleri İstanbul Mahkemesi’nden huzûr. Fî 4 min-L sene 1242