İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 426 Hüküm no: 373 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Lambek v. Yorgi’nin, Kasr-ı Alay karşısındaki dükkân arsasının Bâbıâlî’ye ilavesi için istimlaki Bâb-ı Âlî’ye ilâve olunan sarrâf dükkânı arsası ferâğı Ma‘rûz Arzuhâl eden Sarrâf Lambek v. Yorgi zimmî bi’l-ma‘iyye istimâ‘a me’mûr Haremeyn-i şerîfeyn müfettişi Emin Beyefendi-zâde fazîletlü Abdülkadir Beyefendi tarafından mürsel Kâtib Mehmed Hamdi Efendi ma‘iyyeti ve hâssa mi‘mârı hulefâsından Selim Sâbit ve Mehmed Tahir Halîfeler ma‘rifetleriyle dâ‘îhânemizde ma‘kūd meclis-i şer‘-i münîrde kendi nefsinden asîl ve vâlidesi Nefise Hatun bt. Abdullah tarafından husûs-ı âtîde vekîl-i müseccel-i şer‘îsi zâtı mu‘arrefe Âişe bt. Mehmed Emin nâm hatun muvâcehesinde hâcegân-ı müşeyyedü’l-erkândan Bâb-ı Âlî binâ emîni hazret-i vekâlet-penâhî sa‘âdetlü Halil Beyefendi ibnü’l-merhûm Mustafa Ağa tarafından vekîl-i şer‘îsi es-Seyyid Mehmed Efendi ibnü’l-merhûm es-Seyyid Ahmed ve Dârü’s-sa‘âdeti’ş-şerîfe ağası hazretleri nezâretlerinde âsûde evkāfdan İstanbul’da vâki‘ merhûme ve mağfûrun-lehâ Aynî Şah Sultân -tâbe serâhâ- Hazretleri Vakfı mütevellîsi Mehmed Nazif Efendi tarafından vekîl-i mürseli Teberdâr el-Hâc Mahmud Halîfe hazır oldukları hâlde vakf-ı müşârün-ileyhâ müstagallâtından İstanbul’da Emin Hayreddin mahallesinde Bâb-ı Âlî kurbünde Kasr-ı Âlây karşısında kâin asîl ve müvekille-i mezbûretânın bi’l-icâreteyn tasarruflarında olan menzil tahtında olup hevâsı mezbûretânın uhdelerinde olan terbî‘an on altı zirâ‘ muhterik sarrâf dükkânı arsası babam mersûm Yorgi v. Dimitri zimmînin bâ-temessük-i mütevellî bi’l-icâreteyn tasarrufunda iken bundan akdem hâlik oldukda bana intikāl edip lâkin zikrolunan menzil ve dükkân arsaları tarafeyn ve kurb ve civârında bulunan sâir arsalar ile ma‘an bâ-irâde-i seniyye bu def‘a inşâ olunmakda olan Bâb-ı Âlî’ye ilâve ve idhâl olunmağla ben dahi ber-vech-i muharrer bi’l-intikāl mutasarrıf olduğum sâlifü’z-zikr on altı zirâ‘ sarrâf dükkânı arsasını hüsn-i rızâ ve tayyib-i hâtırım ve ferâğ-ı mu‘teber-i kat‘î ile yüz elli guruş bedel-i makbûz ve müstehlek mukābelesinde bâ-re’y-i mütevellî asîl ve müvekkile-i mezbûretân Nefise ve Âişe Hatunlara ale’l-iştirâki’s-seviy mukaddemâ ferâğ ve tefvîz ve teslîm eylediğimde ol dahi ber-vech-i muharrer tefevvüz ve tesellüm ve kabûl ve bedel-i ma‘lûm ve makbûz mukābelesinde müvekkil-i mûmâ-ileyh Halil Beyefendi’ye bâ-re’y-i mütevellî kat‘iyen ferâğ ve tefvîz ve teslîm etmişdi el-hâletü hâzihî ferâğ-ı mezkûrlarda şurût-ı müfside müdde‘âsına ve bedel-i müstehlek-i merkūm istirdâdına ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü takrîrini asîl ve vekîl-i mezbûre Âişe Hatun asâleten ve vekâleten tasdîk ve mütevellî vekîli merkūm dahi ber-vech-i muharrer tasarruflarına izin verildiğini takrîr ve bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 17 min-L sene 1242