İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 430 Hüküm no: 376 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleko v. Yorgi’nin, Sandal bezzazistanındaki dolab gediğini Magdelini bt. Yani’ye sattığı Sandal bezzâzistânında dolab gediği mübâya‘ası Ma‘rûz İstanbul hısnı ebvâbından Cibali Yeni Kapısı hâricinde Seferikoz mahallesinde mütemekkine iken bundan akdem hâlike olan Hekîm Kamraş zimmî zevcesi Katerine bt. Kostantin nâm Nasrâniyenin sulbî kebîr oğlu ve hasran vârisi olduğu ihbâr olunan derûn-ı arzuhâlde mezkûru’l-ism Aleko v. Yorgi zimmî bi’l-ma‘iyye istimâ‘a me’mûr Haremeyn-i şerîfeyn müfettişi olup İstanbul pâyesiyle tekrîm buyrulan Emin Beyefendi-zâde fazîletlü Abdülkadir Beyefendi taraflarından mürsel Kâtib Mehmed Nizâmeddîn Efendi ile du‘âhânemizde akd olunan meclis-i şer‘-i münîrde sandalcı esnâfından olup bundan akdem hâlik olan Sarı Panayot v. Agayi zimmînin zevce-i metrûkesi ve evlâdı sıgārı Anesti ve Kosti ve Yanko ve Diyoni ve Aleniko’nun bâ-hüccet-i şer‘iye vasîyy-i mansûbesi sahibe-i arzuhâl mu‘arrefetü’ş-şahs Magdelini bt. Yani nâm Nasrâniye muvâcehesinde bâ-berât-ı âlî-şân Sandal bezzâzistânı kethudâsı es-Seyyid Osman Ağa ve bölükbaşısı Osman Ağa ve bekçibaşısı Hasan Ağa hazır oldukları hâlde İstanbul’da Sandal bezzâzistânı derûnunda kâin iki kanad bir kıt‘a dolab derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme mesfûr Sarı Panayot zimmînin sağlığında yedinde mâlı iken bin iki yüz otuz senesi Ramazanü’l-mübârekinin on yedinci günü bin guruş semen-i makbûza gāib ani’l-meclis Tanaşaki v. Kostandi nâm zimmîye kat‘iyen bey‘ ve temlîk ve teslîm eylediğinde ol dahi iştirâ ve temellük ve tesellüm ve kabz ve kabûl <> ve otuz bir senesi Şevvali’l-mükerreminin yirmi yedinci günü enâm-ı mesfûre Katerine Nasrâniyeye sağlığında semen-i ma‘lûm ve makbûza bey‘-ı kat‘î ile bey‘ ve temlîk ve teslîm ol dahi iştirâ ve temellük ve tesellüm ve kabz ve kabûl edip yedinde mâlı iken hâlike oldukda hasran bana mevrûs olmağla bi’l-verâse zabt ve tasarruf murâd eylediğimde mersûme Magdelini Nasrâniye zikrolunan dolab gediğini zevcim mersûm Panayot zimmî târih-i mezkûrda gāib-i mesfûr Tanaşaki zimmîden karz aldığı bin guruş deyni mukābelesinde vefâen bey‘ edip ba‘dehû gāib-i mersûm dahi hâlike-i mersûmeye kezâlik vefâen bey‘ <> etmekle târih-i mezkûrdan bu âna kadar bin guruş bilâ-devr nemâ verilmişdi deyü inkârıma mukārin bi’l-asâle ve bi’l-vesâye nizâ‘a tesâddî etmiş ise de bir vechile isbât ve beyâna kādir olamadığından beynimiz te’lîf olunup ben âlât-ı gedik-i mezkûru tarafeynden bi’l-îcâb ve’l-kabûl bâtten ve sahîhan bi-safkatin vâhidetin sekiz yüz guruş semen tesmiyesiyle mesfûre Magdelini Nasrâniyeye bi’l-verâse bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm [72a] ve kabz ve kabûl ve semen-i merkūm sekiz yüz guruşun dört yüz guruşunu peşînen bana def‘ ü teslîm ve bâkī dört yüz guruşunu dahi târih-i i‘lâmdan on gün mürûrunda tamamen bana edâ ve îfâya ta‘ahhüd etmekle mebî‘-i mezkûrun tağrîr ve gabnine ve semen-i bâkī-i merkūm dört yüz guruşdan mâ‘adâ bi’l-cümle gedik-i mezkûr husûsuna müte‘allika da‘vâdan ben mersûme Magdelini Nasrâniyenin zimmetini ol dahi ancak bi’l-asâle kezâlik benim zimmetimi her birimiz ibrâ-i âm ile ibrâ ve ıskāt ve her birimiz ber-vech-i muharrer âharın ibrâsını kabûl eyledik fîmâ-ba‘d zikrolunan dolab derûnunda mevcûde gedik ta‘bîr olunan âlât-ı lâzıme-i ma‘lûme mesfûre Magdelini Nasrâniyenin mülk-i müşterâsı ve hakk-ı sırfı olup benim asla ve kat‘a alâka ve medhalim kalmamışdır deyü mukırr-ı mersûm Aleko zimmînin bi’l-cümle takrîr-i meşrûhunu mersûme Magdelini Nasrâniye tasdîk ve semen-i bâkī-i merkūm dört yüz guruş zimmetinde mersûm Aleko zimmîye sahîhan deyni olduğunu ikrâr ve i‘tirâf ve ber-vech-i muharrer on gün mürûrunda mesfûr Aleko zimmîye edâya ta‘ahhüd eylediği İstanbul Mahkemesi’nden huzûr. Fî 4 min-Za sene 1242