İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 431 Hüküm no: 377 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleko v. Kostandi’nin yanan tönbekici dükkânında kalpakçı gediği olduğu iddiasının geçersizliği Rubu‘ kalpakçı dükkânı ferâğı Ma‘rûz Sâdır olan fermân-ı âlîlerine imtisâlen zikri âtî husûsu mahâllinde lede’l-mu‘âyene keşf ve tahkīk için cânib-i şerî‘at-i garrâdan me’zûnen irsâl olunan Kâtib Mehmed Hidâyetullah Efendi dâ‘îleri ve bi’l-ma‘iyye rü’yete me’mûr Haremeyn-i şerîfeyn müfettişi olup İstanbul pâyesiyle tekrîm buyrulan Emin Beyefendi-zâde fazîletlü mîr Abdülkadir Efendi tarafından meb‘ûs Kâtib Mehmed Ârif Efendi ile İstanbul’da Dârü’s-sa‘âdeti’ş-şerîfe ağası hazretleri nezâretlerinde olan evkāfdan ashâb-ı hayrâtdan merhûm Mahmud Paşa-yı Velî Câmi‘-i Şerîfi Vakfı müsakkafâtından merhûm-ı müşârün-ileyhin hamamı sırasında vâki‘ etrâf-ı selâsesi vakf-ı müşârün-ileyhden olarak bir tarafdan kürkçü dükkânı ve bir tarafdan çubukçu dükkânı ve bir tarafdan arsa ve taraf-ı râbi‘i tarîk-ı âm ile mahdûd şehriye on dört akçe icâre-i müecceleli vaz‘-ı kadîmi terzi ve ba‘dehû kalpakçı ve ba‘dehû tönbakücü [tönbekici] dükkânı olup bundan akdem vukū‘ bulan harîkde muhterik olan dükkân arsasına varıp cerîdede mazbûtü’l-esâmî Müslimîn huzûrlarında akd-i meclis-i şer‘-i âlî ettiklerinde sahib-i arzuhâl Kalpakçı Aleko v. Kostandi nâm zimmî meclis-i ma‘kūd-ı mezkûrda derûn-ı arzuhâlde mezkûru’l-ism Tönbakücü [Tönbekici] Kigork v. Kerih nâm zimmî muvâcehesinde vakf-ı müşârün-ileyhin mütevellîsi Mustafa Ağa b. İbrahim hazır olduğu hâlde işbu derûnunda akd-i meclis-i şer‘-i âlî olunan dükkân arsasının rub‘u bi’l-münâsafa Manavî Ahmed Ağa ve Halil Ağa ibney Mehmed nâm karındaşların ve nısfı mersûm Kigork zimmînin ve rub‘u hâzır[a] bi’l-meclis mu‘arrefetü’ş-şahs hâletem Limoniye bt. Mihal Nasrâniyenin bâ-temessükât-ı mütevellî bi’l-icâreteyn iştirâken ve şâyi‘an taht-ı tasarruflarında olup lâkin dükkân-ı mezkûrun derûnunda mevcûde bundan akdemce mâlikesi olan anâm Domini bt. Kostandi nâm Nasrâniyeden bi’l-inhisâr bana mevrûs ve kalpakçı esnâfı yedinde olan emr-i âlî-şânda münderic beyne’l-esnâf kalpakçı gediği ta‘bîr olunur âlât-ı lâzıme-i ma‘lûmem olmağla zikrolunan gediği nakl için mahâll-i mezkûru bu esnâda mâlımla binâ etmek murâd eylediğimde mersûm Kigork zimmî mahâll-i mezkûrda kadîm kalpakçı gediği yokdur deyü beni binâdan men‘ etmekle mümâna‘atı men‘ ve def‘ olunmak murâdımdır deyü eylediği da‘vâsını kâtibân-ı mezbûrân mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî ba‘de’l-inhâ mersûm Aleko zimmî huzûr-ı şer‘de ber-vech-i muharrer tesâddî eylediği kalpakçı nizâ‘ından meccânen fâriğ ve mahâll-i mezkûrda dahi kalpakçı gediği olmadığını ba‘de’l-ikrâr ve’l-i‘tirâf hâzıra-i mersûme Limoniye Nasrâniye meclis-i şer‘de mersûm Kigork zimmî muvâcehesinde ber-vech-i muharrer mutasarrıfe olduğum rubu‘ hisse-i şâyi‘amı hüsn-i rızâ ve tayyib-i hâtırım ve ferâğ-ı mu‘teber-i kat‘î ile sekiz yüz guruş bedel-i makbûz ve müstehlek mukābelesinde nısf hisse-i şâyi‘asına mutasarrıf olan mersûm Kigork zimmîye ferâğ ve tefvîz eylediğimde ol dahi ber-vech-i muharrer tefevvüz ve kabûl ve mütevellî-i mezbûr Mustafa Ağa dahi tasarrufuna ba‘de’l-izn husûs-ı mezkûra ve ferâğ-ı mezkûrda şurût-ı müfside müdde‘âsına ve bedel-i müstehlek-i merkūmun istirdâdına müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik ol vechile nısfı mukaddemâ rub‘u hâlâ ki selâse-i erba‘ hissesi mersûm Kigork zimmînin dâhil-i havza-i tasarrufu olup benim rub‘-ı şâyi‘inde kat‘a alâka ve medhalim kalmamışdır deyü ikrâr ve tasdîkleri İstanbul Mahkemesi’nden huzûr. Fî 12 min-L sene 1242