İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 433 Hüküm no: 378 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Osman’ın, evinin altından geçen lağımın mecrasını değiştirmek istediği Lağım keşfi Ma‘rûz Sâdır olan fermân-ı âlîlerine imtisâlen zikri câ’î husûsu mahâllinde bi’l-mu‘âyene keşf ve tahkīk için kıbel-i şer‘-i şerîfden irsâl olunan Kâtib es-Seyyid Ahmed Efendi dâ‘îleri ihtisâb ağası bendeleri taraflarından mürsel Ebûbekir Ağa ve hâssa mi‘mârı ağa tarafından mürsel Derviş Ahmed ve Abdullah Halîfeler ile nezâret-i dâ‘îlerinde olan evkāfdan merhûme Esma Hanım Mekteb-i şerîfi vakfından İstanbul’da Ahırkapı dâhilinde Akbıyık mahallesinde vâki‘ zikri âtî münâza‘un-fîh olan menzile varıp huzûr-ı Müslimînde akd-i meclis-i şer‘-i nebevî ettikde sahib-i arzuhâl es-Seyyid İbrahim Ağa b. es-Seyyid Osman meclis-i ma‘kūd-ı mezkûrda derûn-ı arzuhâlde ismi mezkûr el-Hâc Ömer Ağa b. Mustafa muvâcehesinde vakf-ı mezbûr mütevellîsi hâlâ sadr-ı Anadolu inâyetlü fazîletlü el-Hâc Mehmed Sadullah Efendi hazretleri taraflarından mürsel vekîl-i şer‘îleri Mehmed Ağa b. İbrahim ile şahsı mu‘arrefe Gül bt. Ohan Nasrâniye hazır oldukları hâlde vakf-ı mezbûr müsakkafâtından mezbûr el-Hâc Ömer Ağa’nın bi’l-icâreteyn tasarrufunda olan bir bâb menzilin kârizi kadîmden beri mersûme Gül Nasrâniyenin menzilinin açıklık mahalli ile benim menzilim tahtından tarîk-ı âmda vâki‘ kebîr lağıma cereyân edegelmişiken bundan akdemce mersûme Gül Nasrâniye kendi menzili derûnundan tahte’l-arz cereyân eden lağım-ı mezkûru sed ettikde mezbûr el-Hâc Ömer Ağa dahi Bâb-ı Âlî’ye arzuhâl takdîmiyle lede’l-istid‘â iktizâ-yı şer‘îsinin icrâsına mübâderet olunmak bâbında sâdır olan fermân-ı âlî-şâna imtisâlen ümenâ ve muhtesib ve mi‘mâr-ı mûmâ-ileyhimâ taraflarından adamlar ta‘yîniyle keşf ve baca küşâdıyla mu‘âyene ettirildikde fi’l-vâki‘ lağım-ı mezkûr mine’l-kadîm mahâll-i mezkûrdan cereyân edegeldiği zâhir ve erbâb-ı vukūfun ihbârı ve ikrârımız ile mütehakkık ve bâhir olmağla kadîm olan lağım-ı mezkûru bi-gayr-ı vech sedde kādir olamadığımız bize tefhîm ve lağım-ı mezkûrun kadîmi üzre icrâsı iktizâ eylediği huzûr-ı âlîye i‘lâm olundukda bâlâsına i‘lâmı mûcibince amel olunmak bâbında sâdır olan musahhah fermân-ı âlî-şân mûcibince lağım-ı mezkûr kemâ-kân icrâ olunmuşdu lâkin lağım-ı mezkûr kadîmi üzre menzilim tahtından cereyân eylediği takdîrce te‘affün edeceği me’mûl ve bağçem derûnunda kâin dört sene mukaddem hafr ettirdiğim bi’r-i mâya dahi mazarrâtı olacağı muhtemel ve melhûz olmağla binâen-aleyh lağım-ı mezkûrun menzilim tahtından cereyânı kat‘ ve tarîkı sed ile [72b] âhar mahâlden icrâ ettirilmek matlûbumdur dedikde istikşâf-ı hâl için mi‘mârân-ı mezbûrân ma‘rifetleri ve bu makūle husûsa vukūf ve ıttılâ‘ları olan usta ve lağımcı tâifesinden Mustafa ve Bâyezid nâm kimesnelerin amel ve rü’yetleri ile keşf ve mu‘âyene ettirildikde evvelen lağım-ı mezkûr üzerinde mefrûş baca kapakları arîz ve metîn ve müstahkem kebîr taşlardan olmağla te‘affün ihtimâli olmadığı ve bi’r-i mâ’-i mezbûr ile lağım-ı mezkûr beynlerinde kârgir dîvâr olduğundan mâ‘adâ dîvâr-ı mezkûrun temeli kapıdan iki zirâ‘ mikdârı aşağı olup ol vechile mahfûz ve lağım-ı mezkûrun bi’r-i mâ’-i merkūma iki buçuk zirâ‘ bu‘du ve salâbet-i arz olup bir vechile neşf ve sirâyet ihtimâli olmadığından gayrı bi’r-i mâ’-i mezkûr suyunun levn ve ta‘m ve râyihasında bir vechile tagayyür ve âhar gûne dahi suyu ifsâd eder hâlet mütebeyyin olmadığını kâtib-i merkūm dâ‘îleri mahâllinde ketb ve tahrîr ve ma‘an meb‘ûs ümenâ-i şer‘ ve mi‘mârân ve mütevellî ve me’mûrîn-i merkūmûn ile meclis-i şer‘a gelip tarafeyn hazır oldukları hâlde tasdîklerine mukārin alâ-vukū‘ihî inhâ ve takrîr etmeğin bu sûretde lede’ş-şer‘i’l-enver bir gûne zarar bîni yoğiken lağım-ı mezkûrun tarîk-ı kadîmini seddü tağyîre kādir olmadığı müdde‘î-i merkūm es-Seyyid İbrahim Ağa’ya tefhîm olunmağın mûcibince mazmûn-ı i‘lâm-ı şer‘înin tenfîz ve icrâsı iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 29 min-L sene 1242