Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 380 Hüküm no: 437 Orijinal metin no: [69b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fazlı Efendi b. Ömer’in boşandığı eşi Kâtibe bt. Abdullah’a mehrini ödediği Mahmiye-i İstanbul’da Kırkçeşme kurbunda Sekbânbaşı İbrahim Ağa mahallesinde sâkine Kâtibe bt. Abdullah nâm hâtun tarafından husûs-ı âti’z-zikre vekîl-i müsecceli olan Ahmed Efendi b. Hüseyin meclis-i şer‘-i hatîr-i lâzımü’t-tevkīrde müvekkile-i mezbûrenin zevc-i dâhili olup hâlâ Ordu-yı hümâyûn’da reisü’l-küttâb olan Fazlı Efendi b. Ömer tarafından ikrâr-ı âti’l-beyânı tasdîke vekîl olduğu Sâlih Ağa b. Osman ve Hüseyin Bey b. Ali şehâdetleriyle şer‘an sâbit olan Hasan Efendi b. Abdi mahzarında ikrâr ve takrîr-i kelâm edip müvekkil-i merkūm Fazlı Efendi târih-i kitâbdan üç ay mukaddem zevce-i medhûlün-bihâsı olan müvekkilem mezbûre Kâtibe Hâtun’u şâhidân-ı mezbûrân huzûrunda tatlîk eylediğinden sonra zimmetinde mütekarrir ve ma‘kūdun-aleyh olan otuz bin akçe mehr-i müeccelinin yirmi bin akçesini vekîl-i mezbûr Hasan Efendi’ye irsâl ve bâkī on bin akçesi müvekkilemin iddi‘âsı üzre kalmış idi hâlâ vekîl-i mezbûr Hasan Efendi mehr-i müeccel-i mezbûrun zikr olunan yirmi bin akçesini müvekkilem mezbûre Kâtibe Hâtun’a edâ ve teslîm ol dahi ahz u kabz eyledi dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Veli Bey b. Ahmed, İbrahim Ağa b. Osman, Ali Ağa b. ( ) Bosnevî, Ahmed Efendi b. Ahmed, Mustafa Çelebi b. Ahmed.