İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 436 Hüküm no: 383 Orijinal metin no: [72b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yakof v. Terifinos’un, Mehmed Akif Ağa’dan 1514 guruş alacak davasını ispat edemediği 1514 guruş men‘ Ma‘rûz Arzuhâl eden İstanbul’da Ma‘cûncu Çarşısı’nda Bakkāl Yakof v. Terifinos nâm zimmî meclis-i şer‘-i münîrde hâssa hasekilerinden derûn-ı arzuhâlde mezkûru’l-ism Mehmed Akif Ağa ibnü’l-merhûm Mehmed Emin Ağa muvâcehesinde işbu yedimde olan defter-i müfredâtda her birinin târih ve ecnâs ve mikdâr ve fiyâtı tasrîhiyle şey’en-fe-şey’en muharrer olduğu üzre mezbûr Mehmed Akif Ağa zimmetinde cihet-i karz ve yedimden ve mâlımdan iştirâ ve kabz eylediği sade yağ ve zeytin yağı ve pirinç ve bal ve un ve mum ve peynir ve tuz ve sabun ve zeytin ve fındık ve fısdık ve yumurta ve nişasta ve nohud ve fasulye ve böğrülce ve bulgur ve sarımsak ve sirke ve soğan ve arpa ve pekmez ve nardenk ve mercimek ve sâir bakkāl metâ‘ı ta‘bîr olunur erzâk-ı mütenevvi‘a esmânından min-haysü’l-mecmû‘ bin beş yüz on dört guruş alacak hakkım olmağla hâlâ taleb ederim deyü da‘vâ ettikde ol dahi külliyen inkâr etmekle müdde‘î-i mersûm Yakof zimmî ber-vech-i muharrer müdde‘âsını asla şâhidlerim yokdur deyü bir vechile isbâta kādir olamayıp talebiyle merkūm Mehmed Akif Ağa’ya muvâcehesinde vech-i şer‘î üzre yemîn verilmeğin mûcibince müdde‘î-i mesfûr Yakof zimmî da‘vâ-yı mezkûresiyle mezbûr Mehmed Akif Ağa’ya bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 10 min-Za sene 1242 [Beyaz Beyaz]