İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 437 Hüküm no: 385 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oskihan v. Manol ile Abraham v. Simon’un, Rusyalı Francisko v. Franciskoviç’e 3533 guruş borçları olduğu 3533 guruş hüküm Ma‘rûz Derûn-ı arzuhâlde mesfûru’l-ism Rusyalı Francisko v. Franciskoviç nâm müste’men Çarşamba günü Arz Odası’nda huzûr-ı âsafânelerinde tercümanı Pizani hazır olduğu hâlde ma‘kūd meclis-i şer‘-i münîrde çitçi esnâfından Oskihan v. Manuk ve şerîki Abraham v. Simyon zimmîler muvâcehelerinde mersûmân Oskihan ve Abraham zimmîler târih-i i‘lâmdan altmış dokuz gün mukaddem yedimden ve mâlımdan beher topu yetmiş beşer guruşa olarak iştirâ ve kabz eyledikleri yüz top elvan basmanın semenleri olan cem‘an yedi bin beş yüz otuz üç guruşun dört bin guruşunu târih-i şirâdan dört gün mürûrunda bana edâ ve teslîm ve bakīsi olan üç bin beş yüz otuz üç guruş zimmetlerinde cihet-i merkūmeden bana deynleri olduğunu nâtık Rûmiyyü’l-ibâre bir kıt‘a temessük dahi i‘tâ etmeleriyle meblağ-ı bakī-i merkūm üç bin beş yüz otuz üç guruşu mersûmândan taleb ederim deyü da‘vâ ettikde onlar dahi cevâblarında sâlifü’z-zikr yüz top elvan basmayı ol mikdâr semen tesmiyesiyle mersûmdan iştirâken iştirâ ve kabz ve semen-i mezkûrun vech-i meşrûh üzre dört bin guruşunu teslîm edip bâkīsi olan meblağ-ı merkūm üç bin beş yüz otuz üç guruş deynleri olduğunu nâtık temessük i‘tâ eylediklerini ikrâr ve i‘tirâf edip ancak biz zikrolunan basmayı müste’men-i mersûmdan aldığımız gün emsâlini esnâfımızdan sâirleri âhar müste’menden altmışar guruşa iştirâ etmeleriyle öyle olıcak ben beher topunda on beşer guruş aldanıp mağbûn olmuş olduğumdan zikrolunan basmaları geri alıp teslîm eylediğim meblağ-ı merkūmu bize red ve teslîme müste’men-i mesfûra cebr olunsun deyü teveccüh-i husûmet bulundukdan sonra tesâddî eyledikleri bilâ-tağrîr gabn da‘vâsı mesmû‘a olmadığı zimmiyân-ı mesfûrâna tefhîm olunmağın bu sûretde ikrârları mûcibince meblağ-ı bâkī-i merkūm üç bin beş yüz otuz üç guruş zimmiyân-ı mersûmândan tahsîl ve müste’men-i mesfûra teslîm ettirilmek iktizâ eylediği İstanbul Mahkemesi’nden huzûr. Fî 13 min-Za sene 1242