İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 438 Hüküm no: 386 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Hüseyin’in, satın aldığı tütüncü gediğini ismine kaydettirmek istediği Tütüncü gediği ismine tasrîh Ma‘rûz İstanbul’da Mahmud Paşa’da vâki‘ Kür[k]çü Hânı karşısında kâin ma‘lûmü’l-hudûd bir bâb tütüncü dükkânı derûnunda mevcûde ma‘den kaleminde Ali Ağa ismine mukayyed beyne’l-esnâf gedik ta‘bîr olunur âlât-ı lâzıme-i ma‘lûmeye tedâvül-i eydî ile el-yevm şirâen mâlik ise de yedinde sûret olmadığından bahisle gedik-i mezkûrun kayd-ı atîki kaleminden ref‘ ve terkīn ve kendi ismine tashîhan kayd ile yedine sûret i‘tâsını tütüncü esnâfından es-Seyyid Hasan Ağa b. Hüseyin nâm kimesne istid‘â ve fi’l-vâki‘ gedik-i mezkûr tedâvül-i eydî ile merkūm es-Seyyid Hasan Ağa’nın şirâen mâlı olduğunu ve bu makūle kayd-ı evveline ta‘arruz olunmayarak tedâvül-i eydî bulunan mukayyed tütüncü gediklerinin muahharan mâlikleri isimlerine tashîhan bâ-i‘lâm sûret i‘tâsı şurût-ı nizâmlarından idüğünü esnâf-ı merkūme kethudâsı Osman Ağa ve vekîli el-Hâc Mustafa Ağa ve yazıcısı es-Seyyid Mehmed Nuri Efendi ve yiğitbaşısı Molla Ahmed ve sâir lonca ihtiyârları ihbâr ve inhâ etmeleriyle bu sûretde istid‘âsı şurût-ı nizâma muvâfık olduğundan müsâ‘ade-i seniyyeleri erzânî buyurulup gedik-i mezkûrun merkūm Ali Ağa ismine olan kayd-ı atîki kaleminden ref‘ ve terkīn ve el-yevm mâliki mezbûr es-Seyyid Hasan Ağa’nın ismine tashîhan kayd ile yedine sûret i‘tâsı bâbında fermân-ı âlîleri sudûru iktizâ eylediği İstanbul Mahkemesi’nden huzûr. Fî 3 min-Za sene 1242