İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 439 Hüküm no: 387 Orijinal metin no: [73a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeron v. Serkiz, Andon v. Zahrab ve Vartan v. Arakil’in, ilgili değirmenlerdeki hisselerini, Mehmed Ağa b. Osman ile Aleksan v. Nikogos’a devrettikleri Uncu değirmeni mübâya‘ası ve nakli Ma‘rûz Mahrûse-i Galata’ya muzâfe Beşiktaş nâhiyesine tâbi‘ Kılıç Ali Paşa nâm mahâlde kâin dört horoslu bir kıt‘a uncu değirmeni derûnunda mevcûde gedik ta‘bîr olunur on altı re’s bargir ve sâir âlât-ı lâzıme-i ma‘lûmenin on dört re’s bargir<> ve onlara isâbet eden sâir âlât-ı lâzıme-i ma‘lûmesine mâlik olan Zeron v. Serkiz ve iki re’s bargir ve onlara isâbet eden sâir âlât-ı ma‘lûmesine mâlik olan Andon v. Zöhrab nâm zimmîler taraflarından husûs-ı âti’l-beyânda vekîlleri olduğu uncular kethudâsı Abdülbaki Ağa b. Mustafa ve uncu esnâfından Bedrizâde İsmail Ağa b. Ali nâm kimesneler şehâdetleriyle sâbit olan habbâzân kethudâsı Ali Ağa b. Mehmed Sâdık ve sâlifü’z-zikr Beşiktaş kasabasında vâki‘ bir horoslu muhterik bir kıt‘a uncu değirmeni gedik ta‘bîr olunur harîkden tahlîs olunmuş olan dört re’s bargir ve sâir âlât-ı lâzıme-i ma‘lûmeye müstakillen mâlik olan Vartan v. Arakil nâm zimmîden her biri meclis-i şer‘-i münîrde esnâf-ı merkūmeden Şehrî Mehmed Ağa b. Osman nâm kimesne ile Aleksan v. Nikogos nâm zimmî muvâcehelerinde evvelen vekîl-i merkūm Ali Ağa takrîr-i kelâm edip müvekkillerim zimmiyân-ı mesfûrânın ber-vech-i meşrûh iştirâken ve şâyi‘an mâlikleri oldukları sâlifü’z-zikr Kılıç Ali Değirmeni derûnunda mevcûde gedik ta‘bîr olunan [73b] on altı re’s bargir ve sâir âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile merkūmân Mehmed Ağa ve Aleksan zimmîye ale’l-iştirâki’s-seviy yirmi bin dört yüz guruşa bi’l-vekâle bey‘ ve temlîk ve teslîm eylediğimde onlar dahi ber-vech-i muharrer iştirâk-i seviy üzre iştirâ ve temellük ve tesellüm ve kabz ve kabûl eyledikden sonra semen-i mezkûr yirmi bin dört yüz guruşun üç bin dört yüz guruşunu cânib-i mîrîye ve on yedi bin guruşunu dahi Kapan-ı dakīk tüccârından ma‘lûmü’l-esâmî kimesnelere müvekkilim mesfûrların zahîre esmânından deynleri olan ol mikdâr guruşa mahsûben mahallerine edâ ve îfâ etmek üzre bi’l-vekâle merkūmânı ihâle eylediğimde onlar dahi kabûl ve deyn-i mîrî-i merkūm üç bin dört yüz guruşun bin guruşunu peşînen ve bâkī iki bin dört yüz guruşunu dahi târih-i i‘lâmdan i‘tibâr ile beher sene dört yüz seksener guruş verip mecmû‘unu beş sene tekmîline kadar mukāssatan zahîre hazînesinde kabza me’mûra ve deyn-i tüccâr-ı merkūm on yedi bin guruşu dahi ceste ceste ashâbına edâ ve teslîme ta‘ahhüd etmekle mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini bi’l-asâle ve bi’l-vekâle kabûlü hâvî ibrâ ve ıskāt eyledik fîmâ-ba‘d âlât-ı gedik-i merkūm mezbûran Mehmed Ağa ve Aleksan zimmînin mülk-i müşterâsı ve hakk-ı sırfı olup müvekkillerim mersûmânın alâka ve medhalleri kalmamışdır deyü ikrârını mezbûrân tasdîk eylediklerinden sonra sâniyen asîl-i mesfûr Vartan zimmî takrîr-i kelâm edip ben dahi ber-vech-i muharrer müstakillen mâlik olduğum sâbıku’z-zikr muhterik Beşiktaş Değirmeni gediği ta‘bîr olunan dört re’s bargir ve sâir âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin yine merkūmân Mehmed Ağa ve Aleksan zimmîye kezâlik ale’l-iştirâki’s-seviy iki bin guruş semen-i makbûza bey‘ ve temlîk ve teslîm eylediğimde onlar dahi ber-vech-i muharrer iştirâk-i seviy üzre iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i merkūm mezbûrân Mehmed Ağa ve Aleksan zimmînin mülk-i müşterâları ve hakk-ı sırfları olup benim alâka ve medhalim kalmamışdır deyü takrîrini kezâlik mezbûrân tasdîk eylediklerinden sonra zikrolunan muhterik uncu değirmeni gediğinin mârrü’z-zikr Kılıç Ali Değirmeni’ne nakl ile değirmen-i mezkûr beş horoslu olarak bi’l-iştirâki’s-seviy uhdelerine kayd ile isimlerine tashîhan yedlerine sûret i‘tâsını her biri istid‘â ve ber-vech-i istid‘â horos nakli şurût-ı nizâmlarına muvâfık olduğunu habbâzân kethudâsı ve uncular kethudâsı merkūmân ile mazbûtü’l-esâmî kapan tüccârı ve nizâm ustaları ve uncu esnâfı ihbâr ve inhâ etmeleriyle bu sûretde zikrolunan Kılıç Ali ve Beşiktaş Değirmenlerinin kayd-ı atîkleri kaleminden ref‘ ve terkīn ve sâbıku’z-zikr Beşiktaş Değirmeni gediğinin dahi sâlifü’z-zikr Kılıç Ali Değirmeni’ne nakl ile beş horoslu olarak bi’l-iştirâki’s-seviy uhdelerine kayd ve isimlerine tashîhan yedlerine sûret i‘tâsı muktezâ-yı şurût-ı nizâm idüğü İstanbul Mahkemesi’nden huzûr. Fî 7 min-Ca sene 1242