İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 441 Hüküm no: 389 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pandazi v. Yorgi’nin oğlundan miras kalan bostan gediğini, Beço v. Manoş ve Kozma v. Manoş’a sattığı Menzilhâne bostanı gediği mübâya‘ası Ma‘rûz Âsitâne-i aliyyede vâki‘ bağçevân tâifesinden olup bundan akdem hâlik olan Metro zimmînin verâseti ancak babası Pandazi v. Yorgi zimmîye münhasıra olduğu bi’l-ihbâr mütehakkık oldukdan sonra sahib-i arzuhâl mersûm Pandazi zimmî meclis-i şer‘-i münîrde tâife-i merkūmeden derûn-ı arzuhâlde isimleri mastûr kendi nefsinden asîl ve li-ebeveyn er karındaşı Peço nâm zimmî tarafından husûs-ı âtîde tasdîka vekîl-i şer‘îsi Kozma v. Manoş nâm zimmî muvâcehesinde zikri âtî vakıf bostanın bâ-temessük-i mütevellî bi’l-icâreteyn mutasarrıfesi Fâtıma Letâfet Kadın bt. Abdullah tarafından vekîl-i sâbitü’l-vekâlesi es-Seyyid Mehmed Ataullah Efendi ibnü’l-merhûm es-Seyyid Mehmed Ubeydullah Efendi ile bağçevânlar kethudâsı es-Seyyid Süleyman Ağa ve yiğitbaşısı Çelo zimmî ve sâir mazbûtü’l-esâmî bağçevân tâifesi hazır oldukları hâlde İstanbul’da Topkapı dâhilinde kâin Menzilhâne bostanı demekle meşhûr müvekkile-i mûmâ-ileyhânın mutasarrıfe olduğu bir kıt‘a bostanı senevî yüz ellişer guruş kirâ ile mersûmân Kozma ve Peço zimmîlerin aded [-i şuhûr] ve sinîn beyân olunmaksızın bâ-hüccet taht-ı icârelerinde ve derûnunda mevcûde beyne’l-esnâf gedik ta‘bîr olunur beş bel ve üç çapa ve dört tarak ve iki kazma ve bir tırpıl ve üç kürek ve on kûfe ve bir kantar ve bir terâzi ma‘a-derâhim ve sâir âlât-ı lâzıme-i ma‘lûme dahi oğlum mersûm Metro zimmînin sağlığında bâ-i‘lâm yedinde mâlı iken oğlum mersûm hâlik oldukda âlât-ı gedik-i mezkûr hasran bana mevrûs olmağla hâlâ ben ber-vech-i muharrer ırsen mâlik olduğum âlât-ı gedik-i mezkûru tarafeynden bi’l-îcâb ve’l-kabûl bâtten ve sahîhan bi-safkatin vâhidetin asîl ve müvekkil-i mersûmân Kozma ve Peço zimmîlere ale’l-iştirâki’s-seviy dört yüz guruş semen-i makbûza bi’l-verâse bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın [74a] zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr mersûmân Kozma ve Beço zimmîlerin bi’l-iştirâki’s-seviy emvâl-i müşterâları ve hakk-ı sırfları olup benim asla ve kat‘a alâka ve medhalim kalmamışdır deyü mukırr-ı mersûm Pandazi zimmînin bi’l-cümle takrîr-i meşrûhunu asîl ve vekîl-i mersûm Kozma zimmî bi’l-asâle ve bi’l-vekâle tasdîk bostan-ı mezkûr vech-i meşrûh üzre senevî ol mikdâr kirâ ile mersûmânın taht-ı icârelerinde olduğunu dahi vekîl-i hâzır-ı merkūm es-Seyyid Mehmed Ataullah Efendi bi’l-vekâle ikrâr ve bu vechile kat‘-ı nizâ‘ eyledikleri İstanbul Mahkemesi’nden huzûr. Fî 21 min-Za sene 1242