İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 442 Hüküm no: 390 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Reis b. Mehmed ile İsmail Reis b. Ali’nin sefine bedeli niza’ından 1000 guruşa sulh oldukları Sefîne nizâ‘ından 1000 guruşa sulh Ma‘rûz Derûn-ı arzuhâlde mezkûru’l-ism Ereğlili Abdullah Reis b. Mehmed Emin meclis-i şer‘-i münîrde sahib-i arzuhâl Sakaryalı İsmail Reis b. Ali muvâcehesinde ben bundan akdem zikrolunan Ereğli kasabasında mâlımla ve Der-aliyye’ye nakleylediğim el-yevm Cibali İskelesi’nde merbût beş çifte ta‘bîr olunur bir kıt‘a sefînenin kıymeti on bin guruşa mütehammil iken mezbûr İsmail Reis beni tağrîr ile ancak altı bin beş yüz guruş semen-i makbûza iştirâ edip ol vechile ben bey‘-ı mezkûrda merkūmun tağrîrine binâen gabn-i fâhiş ile mağbûn olmamla medfû‘u olan semen-i mezkûr altı bin beş yüz guruşu alıp sefîne-i mezkûreyi bana red ve teslîme merkūm İsmail Reis’e tenbîh olunmak matlûbumdur deyü tesâddî eylediğim da‘vâmdan mezbûr İsmail Reis ile bi’t-tav‘ ve’r-rızâ an-inkâr bin guruş bedel-i makbûza sulh olduğumda ol dahi sulh-ı mezkûru ba‘de’l-kabûl bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt etmemizle fîmâ-ba‘d sefîne-i mezkûre merkūm İsmail Reis’in mülk-i müşterâsı ve hakk-ı sırfı olup benim bir vechile hak ve alâkam ve bir gûne da‘vâ-yı medhalim kalmamışdır deyü ikrâr ve tesâdukları İstanbul Mahkemesi’nden huzûr. Fî 22 min-Za sene 1242