İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 443 Hüküm no: 391 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borç karşılığında ev tasarrufu hususunda Mazlum Ömer Ağa ile Aleniko bt. Yorgi ve Maryora bt. Dimitri’nin 700 guruşa sulh oldukları Şartla menzil ferâğı maddesi Ma‘rûz Beledî tâifesinden olup bundan akdem müte‘âkiben hâlikler olan Yorgi v. Tanaş ve Anaştaşya bt. Yani nâm zevcânın sagīre kızları Aleniko’nun tesviye-i emrine vasîyy-i muhtârı arzuhâl eden bakkāl tâifesinden Caganos Tanaş v. Nikola ile hâlike-i mesfûre Anaştaşya’nın sadriye kebîre kızı Maryora bt. Dimitri Nasrâniyenin zevci ve tarafından husûs-ı âtîde vekîl-i sâbitü’l-vekâlesi Sandalcı Yorgaki v. Lazari zimmîler ile nezâret-i hazret-i şeyhülislâm-ı sellemehü’s-selâmîde âsûde evkāf müfettişi müderrisîn-i kirâm-ı zevi’l-ihtirâmdan Meşreb Efendi hafîdi fazîletlü Mehmed Ârif Efendi tarafından mürsel Hasan Efendi hazır olduğu hâlde akd olunan meclis-i şer‘-i münîrde nezâret-i hazret-i müşârün-ileyhde olan evkāfdan Emir Ahmed el-Buhârî -kuddise sirruhû- hazretleri vakfının bi’l-meşrûta mütevellîsi Şerife Hanım tarafından vekîli câbî-i vakf Şâkir Efendi b. el-Hâc Abdullah hazır olduğu hâlde derûn-ı arzuhâlde mezkûru’l-ism Kapan-ı dakīk tüccârından Trabzonî Mazlum el-Hâc Ömer Ağa b. Ahmed nâm kimesne mahzarında zevcân-ı hâlikân-ı mesfûrân Yorgi zimmî ve Anaştaşya Nasrâniye sağlıklarında bi’l-icâreteyn münâsafeten mutasarrıflar oldukları vakf-ı mezkûr müstagallâtından İstanbul’da Balatkapısı dâhilinde çingene mahallesinde vâki‘ ma‘lûmü’l-hudûd beher şehr yüz akçe icâre-i müecceleli tahtında bir bâb bakkāl dükkânını müştemil bir bâb menzillerini bin iki yüz yirmi sekiz senesi Ramazanü’l-mübâreği gurresinde vakf-ı mezkûrun kāimmakām-ı mütevellîsi bulunan es-Seyyid Abdülbaki Efendi huzûrunda mezbûr Mazlum el-Hâc Ömer Ağa’ya beynlerinde ma‘lûm deyni mukābelesinde her ne zaman edâ-i deyn ederler ise red ve ferâğ etmek şartıyla bâ-re’y-i mütevellî fâriğler olduklarında ol dahi vech-i meşrûh üzre kabûl ve kāimmakām-ı merkūm dahi tasarrufuna ol şartla izin vermişdi lâkin şart-ı mezkûra mukārenetle olan ferâğın adem-i sıhhatine binâen menzil-i mezkûrun nısf-ı şâyi‘i hâlik-i mesfûr Yorgi zimmîden ancak kızı sagīre mesfûre Aleniko’ya nısf-ı âharı dahi hâlike-i mesfûre Anaştaşya Nasrâniyeden kızları sagīre-i mezbûre ile kebîre kızı Maryora’ya hasbe’l-âde intikāl etmekle alacağı olan mebâliği hâlikân-ı zevcân-ı mersûmânın terekelerinden ba‘de’l-isbât ve’l-hükm ahz-birle menzil-i mezkûrdan keff-i yedine mezbûr Mazlum el-Hâc Ömer Ağa’ya tenbîh olunması bi’l-vesâye ve bi’l-vekâle matlûbumuzdur deyü da‘vâ ettiklerinde ol dahi cevâbında hâlikân-ı zevcân-ı mesfûrân sağlıklarında mâlımdan ve yedimden bi’l-ma‘iyye istidâne ve kabz eyledikleri iki bin beş yüz guruş mukābelesinde her ne zaman edâ-i deyn ederler ise red [ve] ferâğ etmek şartıyla bâ-re’y-i mütevellî bana fâriğler olmalarıyla meblağ-ı mezkûr iki bin beş yüz guruşu def‘ ü teslîm etmemle meblağ-ı merkūmu vâzı‘u’l-yed oldukları tereke-i hâlikân-ı mesfûrândan taleb ederim deyü vasî ve vekîl-i mesfûrânın inkârlarına mukārin eylediği müdde‘âsını lede’t-tezkiye makbûlü’ş-şehâde idükleri ihbâr olunan Tütüncü Mehmed Nuri Ağa b. el-Hâc Mehmed ve es-Seyyid Hüseyin Ağa b. es-Seyyid Mustafa nâm kimesneler şehâdetleriyle bi’l-muvâcehe ber-nehc-i şer‘î ba‘de’l-isbât ve’l-half mezbûr el-Hâc Ömer Ağa meblağ-ı merkūm iki bin beş yüz guruşun ancak yedi yüz guruşu mutâlebesine müte‘allika âmme-i da‘vâdan verese-i mersûmenin zimmetlerini kabûlü hâvî ibrâ ve ıskāt edip bâkīsi olan bin sekiz yüz guruşu dahi vasî ve vekîl-i mesfûrân Tanaş ve Yorgaki zimmîler kıbel-i şer‘den me’zûn olarak tereke-i hâlikân-ı mesfûrâna rücû‘ etmek <<şartıyla>> üzre mezbûr el-Hâc Ömer Ağa’ya edâ ve teslîm ol dahi ahz ü kabz ve menzil-i mezkûrun üç rub‘unu sagīre-i mersûme Aleniko’ya ve bir rub‘unu Mariya [Maryora] Nasrâniyeye bâ-re’y-i mütevellî fâriğ olup kāimmakām-ı hâzır-ı mezbûr dahi mesfûretânın tasarruflarını re’y edip bu vechile külliyen kat‘-ı nizâ‘ eyledikleri İstanbul Mahkemesi’nden huzûr. Fî 20 min-Recebi’l-ferd sene 1242