İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 445 Hüküm no: 392 Orijinal metin no: [74a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâbık Sabun Nazırı Tiryakizâde Mehmed Ağa’nın, alacaklılarına olan borcunu eda ettiği Sabun Nâzırı Tiryâkizâde Mehmed Ağa’dan 5041 guruş 18 para ahz ü kabz Ma‘rûz Sâbıkā Sabun Nâzırı Tiryâkizâde Mehmed Ağa’dan ber-vech-i âtî dört yüz altmış sekiz guruş alacağını kabz eden hâlâ Sabun Nâzırı Rüstem Hoca b. el-Hâc İsmail ve beş yüz yetmiş üç guruş otuz altı para alacağını kabz eden es-Seyyid el-Hâc Emrullah Ağa b. Mehmed ve dört yüz altmış guruş on iki para alacağını kabz eden Molla İsmail b. Ahmed ve otuz guruş alacağını kabz eden Salih Ağa b. Abdullah nâm kimesneler asâleten ve yedi yüz on altı guruş on sekiz para alacağını kabz eden Âşık Hasan b. Ali kendi nefsinden asâleten ve üç yüz kırk sekiz guruş dokuz para alacağını kabz eden es-Seyyid Mehmed Ali Ağa b. el-Hâc Mustafa ve üç yüz yirmi guruş on bir para alacağını kabz eden Bacader oğlu Vasil v. Yorgi nâm zimmî taraflarından dahi vekîlleri olduğu mezbûrân Molla İsmail ve Salih Ağa şehâdetleriyle sâbit olmağla vekâleten ve altı yüz altmış guruş yirmi üç para alacağını kabz eden Yorgi ve Dominiko v. Yani ve sekiz yüz kırk dört buçuk guruş alacağını kabz eden Kara Lambo v. İstirati zimmîler kezâlik asâleten ve altı yüz on bir guruş dokuz para alacağını kabz eden Rika v. Kostandi nâm zimmî tarafından vekîl olduğu şâhidân-ı mezbûrân şehâdetleriyle sâbit olan Simo v. Fotino nâm zimmî vekâleten her biri meclis-i şer‘-i münîrde merkūm Mehmed Ağa b. Abdullah tarafından husûs-ı âtîde vekîl-i müseccel-i şer‘îsi Salih Efendi b. Musa muvâcehesinde [74b] biz bundan akdem mâlımızdan âhara bey‘ için mezbûr Mehmed Ağa’ya teslîm eylediğim ma‘lûmü’l-mikdâr ve’l-fiyât sabunu ma‘lûmü’l-esâmî mikdârını dahi bize teslîm etmişdi el-hâletü hâzihî makbûzât ve teslîmâtının hesâblarını sehv ve galatdan ârî yegān yegān sahîhan rü’yet eylediğimizde ber-vech-i bâlâ zimmetinde zuhûr eden min-haysü’l-mecmû‘ beş bin kırk bir guruş on sekiz para sahhu’l-bâkī alacak hakkmız vech-i meşrûh üzre bize edâ ve teslîm biz dahi ahz ü kabz ve külliyen istifâ-yı hak etmemizle bi’l-cümle husûs-ı mezkûra ve sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü ikrâr ve tesâdukları İstanbul Mahkemesi’nden huzûr. Fî 24 min-Ş sene 1242