İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 445 Hüküm no: 393 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuru yemişçi Mehmed b. Ahmed’in, esnafına itaat taahhüdüne karşılık ihrac edilmediği Kuru yemişçi esnâfına itâ‘ate ta‘ahhüd Ma‘rûz Âsitâne-i aliyyede vâki‘ kuru yemişçi esnâfı kethudâsı Mustafa Ağa ve ihtiyârlarından es-Seyyid el-Hâc Ahmed Ağa ve el-Hâc Veliyüddin Ağa ve Uzun Mehmed Ağa ve es-Seyyid el-Hâc Yusuf Ağa ve Molla Hasan ve Molla Ahmed ve Ali Molla ve Molla Ali ve es-Seyyid Hasan Yazıcı ve sâirleri meclis-i şer‘-i münîrde esnâf-ı merkūmeden es-Seyyid Mehmed b. es-Seyyid Ahmed nâm kimesne muvâcehesinde mezbûr es-Seyyid Mehmed kethudâ ve ihtiyârlarımıza itâ‘at ve şurût-ı nizâmımıza ri‘âyet etmeyip münâfî-i edeb ve muhıll-i nizâm hareket etmekle esnâfımızdan ihrâc olunmasını iltimâs etmişdik lâkin merkūm es-Seyyid Mehmed fîmâ-ba‘d hilâf-ı şer‘-i şerîf ve mugāyir-i rızâ hareketde bulunmayıp kethudâ ve ihtiyârlarımıza inkıyâd ve şurût-ı nizâmımıza mürâ‘ât ederek kendi hâlinde ırz ü edebiyle meşgūl ve kâr ü kesbiyle me’lûf olmağa müte‘ahhid ve eğer hilâfı hareket eder ise tedîbine râzı oldukda biz dahi ta‘ahhüdünü kabûl ve şikâyetimizi te’hîr eyledik deyü takrîrlerini mezbûr es-Seyyid Mehmed tasdîk ve bu vechile beynleri te’lîf olunduğu İstanbul Mahkemesi’nden huzûr. Fî 10 min-Za sene 1242