İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 446 Hüküm no: 394 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki Ali Ağa b. İbrahim ile İbrail’deki ortağı Çalıkzâde Mehmed Ağa’nın ortaklıklarına dair Kapan-ı dakīk şirketliğine dâir re’y-i âlîye menût muktezâ Ma‘rûz Vüzerâ-yı ızâmdan Ebûbekir Sıdkı Paşa hazretlerinin bundan akdem mühürdârı sahib-i arzuhâl es-Seyyid Ali Ağa b. İbrahim nâm kimesne sene-i sâbık[a] Cemâziyelevvelinin yirmi birinci günü mâlından otuz bin guruş ve Kapan-ı dakīk tüccârından derûn-ı arzuhâlde ismi mezkûr bundan akdem tard-ı eşhâs esnâsı vilâyeti olan İbrail’e gidip rûz-ı Kasım’da yine Dersa‘âdet’e gelmeğe me’zûn olduğu tüccârın ihbârıyla mütehakkık olan gāib ani’l-beled Çalık-zâde Mehmed Emin Ağa dahi mâlından otuz bin guruş ki cem‘an altmış bin guruş ifrâz ve birbirine halt ile fâide-i hâsıla beynlerinde beraber iktisâm olunmak üzre hınta ve şa‘îr ve hubûbât-ı sâire bey‘ ve şirâsında akd-i şirket eylediklerinden sonra re’s-i mal-ı mezkûr otuz bin guruşu sahib-i arzuhâl merkūm es-Seyyid Ali Ağa şerîki gāib-i mezbûra tamamen teslîm ol dahi ba‘de’l-ahz bundan akdem bâ-emr-i âlî mârrü’z-zikr mahrûse-i İbrail’e gidip mal-ı şirket-i mezkûrdan olarak ba‘zan ol tarafdan irsâl eylediği hubûbâtı gāib-i merkūmun diğer şerîki olup el-yevm Âsitâne-i aliyyede sâkin Tophâneli Hasan Yazıcı nâm kimesne ahz ve füruht ve esmânını gāib-i mezbûr Mehmed Emin Ağa’nın sâir dâyinlerine verip ol vechile mezbûr es-Seyyid Ali Ağa re’s-i mal-ı mezkûr ve gerek fâide-i hâsıladan kat‘a nesne alamadığından şirket-i mezkûrenin hesâbını rü’yet-birle fâide-i hâsıladan hissesi ile re’s-i mal-ı mezkûrunu mahâllinde ahz ü kabz ve makbûzunu kendüye irsâle mahrûse-i mezbûrede sâkin <> es-Seyyid Mustafa Ağ b. Tatar Ali nâm kimesneyi mukaddemâ bâ-mektûb vekîl nasb ve ta‘yîn eylediğinde vekîl-i merkūm dahi şirket-i mezkûrenin hesâbını rü’yet murâd eylediğinde re’s-i mal-ı mezkûrun üç bin guruşunu tenzîl ile bâkī yirmi yedi bin guruşu nâtık vekîl-i mezbûruyla bir kıt‘a tahvîl irsâl etmiş ise de kabûl olunmayıp geri ol tarafa irsâl olunmuş olup lâkin mezbûr es-Seyyid Ali Ağa bundan akdemce re’s-i mal-ı mezkûrunun bin dokuz yüz on dört guruş on parasını şerîki gāib-i mezbûrun mâlından olarak merkūm Hasan Yazıcı yedinden kabz etmekle makbûzu olan meblağ-ı mezkûr re’s-i mal-ı mezkûr otuz bin guruşdan lede’t-tenzîl mâ‘adâsı olan yirmi sekiz bin seksen beş guruş otuz parayı şerîki gāib-i mezbûrun Âsitâne-i aliyyede mevcûd mâlından alınmak bâbında fermân-ı âlîleri sudûrunu mezbûr es-Seyyid Ali Ağa işbu arzuhâliyle istid‘â ve ol bâbda sâdır olan fermân-ı âlî-şâna imtisâlen husûs-ı mezkûr[u] evvel-emirde tahkīk için taraf-ı dâ‘iyânemden mürsel Kâtib es-Seyyid Ahmed Rızâ Efendi dâ‘îleri Kapan-ı dakīk hâricinde berber dükkânında reisler kethudâsı el-Hâc Veliyüddin Ağa ve tüccârından Hatîbzâde el-Hâc Hasan Ağa b. Ali ve Bağdâdîzâde İbrahim Ağa b. el-Hâc Emin ve es-Seyyid el-Hâc Said Efendi b. es-Seyyid Ahmed ve Kebecizâde el-Hâc Mehmed Ârif Ağa b. el-Hâc İsmail nâm kimesneler ve sâirlerinden suâl ettikde merkūm es-Seyyid Ali Ağa’nın istid‘âsı vâkı‘a mutâbık olup el-yevm şerîki gāib-i mezbûr Mehmed Emin Ağa zimmetinde re’s-i mal-ı mezkûrdan bâkī mezbûr yirmi sekiz bin seksen beş guruş otuz para alacak hakkı olup lâkin mezbûrun el-yevm bu tarafda mevcûd mâlı olmayıp fakat Tuna sevâhilinde martiko ta‘bîr olunur iki kıt‘a sefîneden birinde bir rubu‘ ve birinde üç rubu‘ hissesi olup zikrolunan sefîneler hamûleleriyle çend eyyâm zarfında Âsitâne-i aliyyeye bi-inâyetillâhi te‘âlâ duhûlü müyesser olur deyü haber vermişler ise de evvelen husûs-ı mezkûrda gāib-i mezbûrun bu tarafda kendi ve gerek vekîl-i müsbet-i şer‘îsi olmadıkça hükm-i şer‘î tahtına giremeyip ancak <> merkūm es-Seyyid Ali Ağa’nın istid‘âsına müsâ‘ade-i re’y-i âlîye menût idüğü İstanbul Mahkemesi’nden huzûr. Fî 14 min-Za sene 1242