İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 447 Hüküm no: 395 Orijinal metin no: [74b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnafının zarardan korunmalarına dair Nân-ı azîz husûsu takrîri Ma‘rûz Zahîre nâzırı izzetlü efendi bendelerinin işbu takrîri bâlâsına irâde-i isâbet-âde-i hilâfet-penâhîyi hâkî olarak sâdır olan fermân-ı âlîlerine imtisâlen işbu sene-i mübâreke Şevvali ibtidâsından beri habbâzân tâifesine gerek mîrî anbârları ve gerek Kapan-ı dakīk vâridâtından me’mûrîn ma‘rifetleriyle iktizâ ettikçe tevzî‘ ve i‘tâ olunan otuz bin keyl ecnâs-ı zehâire kıyâsen evvel-i emirde nâzır-ı mûmâ-ileyh ve Kapan-ı dakīk nâibi ve taraf-ı şer‘den mürsel vekāyi‘ kâtibi ve ihtisâb ağası ve anbâr emîni [ve] ser-tebdîl-i sadâret-penâhî ve sâir erbâb-ı vukūfdan reisler kethudâsı ve Kapan-ı dakīk tüccârı ve bi’l-cümle nizâm ustaları ma‘rifetleriyle anbâr-ı âmireden berâ-yı nümûne iktizâ eden üç keyl hınta dikkat-i tâm ile ahz olunup zikrolunan zahîrenin bir keyl ve bir şiniki Bergos ve münakkah hıntalardan olup hınta-i mezkûrelerin anbâr fiyâtı beher keyli yüz yirmi beşer paraya ve kapan fiyâtı yüz otuz dört paraya ve yarım keyli Mısır hıntası olup beher keyli yüz on paraya ve yarım keyl bir şiniki Kızılca hıntası olup beher keyli ba‘zan yüz ve ba‘zan yüz iki paraya ve bir şiniki kokoroz olup beher keyli seksen paraya ve bir şiniki Kalas hıntası olup beher keyli yüz elli iki paradan hesâb-ı mezkûr üzre zikrolunan üç keylin cem‘an semeni üç yüz elli paraya bâliğ ve üç keyle taksîm olundukda beher keyli ale’s-seviye yüz on altı para iki akçe edip ol vechile hınta-i mezkûre Saraçhânebaşı’nda vâki‘ habbâz fırınında bizzât bu dâ‘îleri ve sâir me’mûrîn hazır olarak tahn olundukda beher keylinden <> on altı buçuk vakıyye olmak üzre üç keyl hıntadan kırk dokuz buçuk vakıyye [75a] dakīk-ı saf eğerçi <> zuhûr edip lâkin esnâf-ı merkūme ba‘zan kapan vâridâtı olup beher vakıyyesi dokuzar paraya olan Kızılca dakīkından zikrolunan hıntanın humusu mikdârıdakīk izâfe etmeleriyle ol mikdâr Kızılca dakīkı dahi zam ve tabh <> olundukda hesâb-ı mezkûr üzre zikrolunan numûneden berâ-yı irâe takdîm olunan nân-ı azîz hâsıl ve bu sûretde altı horoslu bir kıt‘a değirmende tahn ve tabh olunan kırk sekiz keyl hıntadan beher yükü yüz yirmi vakıyyeden ibâret olan sekiz yük yirmi iki vakıyye dakīk zuhûr ve ol mikdâr dakīkden üç yüz on bir buçuk guruşluk nân-ı azîz olacağı ba‘de’t-tebeyyün sâlifü’z-zikr kırk sekiz keyl hıntanın fiyât-ı mezkûre hesâbınca iktizâ eden yüz kırk guruş hınta bahâsı ve kırk iki guruş sâlifü’z-zikr Kızılca dakīkı bahâsı esnâf-ı merkūmûnun takdîm olunan defterde beyân ettikleri yüz yirmi dört guruş mesârifleri ve otuz bir buçuk guruş mu‘tâd üzre ondalığı cem‘an üç yüz otuz yedi guruşa resîde olup meblağ-ı merkūm üç yüz on bir buçuk guruş meblağ-ı mecmû‘-ı merkūmdan fürû-nihâde oldukdan sonra yirmi beş buçuk guruş ziyân görünüp ancak zikrolunan yirmi beş buçuk guruşun bi’t-terâzî on dört guruşu ibkā ve minvâl-i muharrer üzre numûne misillü hâsca tabh olunduğu takdîrce on bir buçuk guruş zararları cümle me’mûrîn tahkīkleriyle zâhir olduğu muhât-ı ilm-i âlem-ârâ-yı <> âsafâneleri buyruldukda bu sûretde bi-mennihî te‘âlâ mahsûl-i cedîd idrâkine kadar sâbıklarda olduğu misillü şimdilik esnâf-ı merkūmenin hâllerine merhameten ne vechile irâde buyurulur ise ol vechile i‘âne ile kesret-i mesârif sebebiyle mübtelâ oldukları hasârdan vikāye buyurulmak muktezâ-yı hâllerinden idüğü huzûr. Fî 8 min-Za sene 1242 Vekāyi‘ efendi ile mukābele-şüd