İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 452 Hüküm no: 400 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simyon v. Apostol’ün, Seyyid Ömer mahallesindeki evdeki hissesini Magdelini bt. Anaştaş’a devrettiği Nısf menzil ferâğı Ma‘rûz Sahib-i arzuhâl Simyon v. Apostol nâm zimmî bi’l-ma‘iyye istimâ‘a me’mûr nezâret-i hazret-i şeyhülislâm-ı sellemehü’s-selâmîde âsûde evkāf müfettişi müderrisîn-i kirâm-ı zevi’l-ihtirâmdan Meşreb Efendi hafîdi fazîletlü Mehmed Ârif Efendi tarafından mürsel Kâtib Mehmed Es‘ad Efendi ma‘iyyetiyle akd olunan meclis-i şer‘-i münîrde derûn-ı arzuhâlde mezkûreti’l-ism mu‘arrefetü’ş-şahs Magdelini bt. Anaştaş nâm Nasrâniye muvâcehesinde nezâret-i hazret-i müşârün-ileyhde âsûde evkāfdan merhûm Hoca Sâdık Efendi Vakfı’nın evlâdiyet ve meşrûtiyyet üzre mütevellîsi Şerife Fâtıma Hatun tarafından mürsel vekîli câbî-i vakf Ali Ağa hazır olduğu hâlde vakf-ı mezkûr müstagallâtından İstanbul’da Altımermer kurbünde Seyyid Ömer mahallesinde Küçük Hamam civârında kâin bir tarafdan Sâbih Ali Efendi Vakfı’ndan Ağardıcı Yanaki zimmî ile zevcesi İrini Nasrâniyenin iştirâken tasarruflarında olan menzil ve bağçe ve bir tarafdan ba‘zan Emirler Tekyesi Vakfı’ndan Hristodola Nasrâniye bağçesi ve ba‘zan Hekîmbaşızâde Ali Paşa Vakfı’ndan Bakkal Aci Nikola zimmî menzili ve bağçesi ve bir tarafdan ba‘zan vakf-ı âhardan ve ba‘zan Gazanfer Ağa Vakfı’ndan iki yüz kırk yedi zirâ‘ arsa ve bir tarafdan tarîk-ı âm ile mahdûd keşf ve i‘lâmı mantûkunca mi‘mârân-ı <> hâssa misâhalarıyla tarîk-ı âm tarafından tûlen on beş zirâ‘ ve arzan sekiz zirâ‘ on sekiz parmak bi-hesâb-ı terbî‘-i yüz otuz bir zirâ‘ arsada birbiri üzerine mebnî iki bâb oda ve bir matbah ve bir zukāk kapısını müştemil beher şehr altmış akçe icâre-i müecceleli mahâllin sülüs hisse-i şâyi‘ası benim ve sülüsân hisse-i şâyi‘ası dahi mersûme Magdelini Nasrâniyenin bâ-temessük-i mütevellî bi’l-icâreteyn taht-ı tasarrufumuzda olup lâkin mahâll-i mezkûru şâyi‘an isti‘mâl müte‘assir ve ifrâz ve taksîmi dahi gayrı kābil olduğundan ben sülüs hisse-i şâyi‘a-i mezkûremi hüsn-i rızâ ve tayyib-i hâtırım ve ferâğ-ı mu‘teber-i kat‘î ile altı yüz guruş bedel-i makbûz ve müstehlek mukābelesinde bâ-re’y-i mütevellî mesfûre Magdelini Nasrâniyeye ferâğ ve tefvîz ve teslîm eylediğimde ol dahi ber-vech-i muharrer tefevvüz ve kabûl etmekle bi’l-cümle husûs-ı mezkûra ve bedel-i müstehlek-i mezkûrun istirdâdına ve ferâğ-ı mezkûrda şurût-ı müfside müdde‘âsına ve sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûl-i hâvî ibrâ ve ıskāt eyledik fîmâ-ba‘d mahâll-i mezkûrun mecmû‘u müstakillen mersûme Magdelini Nasrâniyenin dâhil-i havza-i tasarrufu ve hakk-ı müfevvazı olup benim kat‘a alâka ve medhalim kalmamışdır deyü mukırr-ı mersûm Simyon zimmînin bi’l-cümle takrîr-i meşrûhunu mesfûre Magdelini Nasrâniye tasdîk ve mahâll-i mezkûru müstakillen mersûme Magdelini Nasrâniyenin tasarrufunu mütevellî vekîli hâzır-ı merkūm bi’t-tevliye re’y edip külliyen kat‘-ı nizâ‘ eyledikleri İstanbul Mahkemesi’nden huzûr. Fî 22 min-Za sene 1242