İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 453 Hüküm no: 401 Orijinal metin no: [75b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galib Paşa’nın çalgıcı mehterbaşısı Ahmed Ağa’nın ailesinin Erzurum’dan İstanbul’a gelmelerine izin Diyâr-ı âhardan Âsitâne’ye mürûruna ruhsat Ma‘rûz Sâdır olan fermân-ı âlîlerine imtisâlen işbu arzuhâlde istid‘â olunan husûsu tahkīk için İstanbul’da Edirnekapısı kurbünde Kasım Ağa mahallesi imâmı Ali Efendi ve müezzini Emin Efendi ve ahâlîsinden Bürüncekçi es-Seyyid Mehmed Râşid Ağa ve Uncu Mustafa Ağa ve Hacı Yusuf Efendi etbâ‘ından Abdullah Ağa ve sâirleri nezd-i dâ‘iyâneme celb ile suâl olundukda sahib-i arzuhâl uzun boylu kumral sakallı Ahmed Ağa ve devletlü Galib Paşa hazretlerinin çalgıcı [76a] mehterbaşısı olmak takrîbiyle mahalle-i mezbûrede tezevvüc eylediği ıyâl ve üç nefer kerîmeleri ve bir nefer Ayvaz zimmî ile bundan akdem müşârün-ileyh hazretleri ma‘iyyetiyle Der-aliyye’den âzim olup hidmet-i âsafânelerinde iken bu def‘a medîne-i Erzurum’dan me’zûnen bu tarafa avdet etmiş ve zevce ve evlâdı merkūmûnun Dersa‘âdet’e gelmeleri husûsu ruhsat-ı seniyyelerine muhtâc olduğundan tevkīf olunmuş ise de fi’l-vâki‘ merkūm Ahmed Ağa’nın zevcesi merkūme mahalle-i mezbûre sâkinelerinden olarak bu tarafda tezevvüc eylemiş ve evlâdı merkūmûn dahi bu tarafda tevellüd etmiş olup me’mûnu’l-hâl ve ehl-i ırz makūlesinden ve cümlesi kadîmî İstanbul sükkânından olduklarını ve bu tarafa gelmelerinde bir gûne mahzûr olmadığını ihbâr ve tatbîkan li’n-nizâm her biri tekeffül eyledikleri ma‘lûm-ı devletleri buyruldukda ber-vech-i istid‘â merkūmûnun Dersa‘âdet’e gelmeleri husûsuna müsâ‘ade-i seniyyeleri erzânî buyurulmak re’y-i <> âlîlerine menût idüğü İstanbul Mahkemesi’nden huzûr. Fî 29 min-Za sene 1242