Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 381 Hüküm no: 439 Orijinal metin no: [70a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahin Ağa b. Abdullah’ın Ahmed Beşe b. Hüseyin’e ait buğday ve burçak bedelini vârislerine ödediği Mahmiye-i İstanbul’da Sarrâc Doğan mahallesinde sâkin Şâhin Ağa b. Abdullah meclis-i şer‘-i şerîf-i enverde mahmiye-i mezbûrede Âşıkpaşa mahallesi ahâlîsinden olup vilâyet-i Anadolu’da Kemer kasabasında ticâret vechi üzre sâkin iken bundan akdem vefât eden Ahmed Beşe b. Hüseyin’in sulbî sagīr oğlu İsmail ve sulbiye sagīre kızı Fâtıma’nın tesviye-i umûrlarına kıbel-i şer‘den mansûb vasîleri olan işbu râfi‘ü’l-kitâb el-Hâc Ali b. Abdullah mahzarında ikrâr-ı tâm ve takrîr-i kelâm edip mezbûr Ahmed Beşe kasaba-i mezbûrede fevt oldukda ben kasaba-i mezbûrede yeniçeri serdarı bulunmağla müteveffâ-yı mezbûrun kasaba-i mezbûrede der mahzen olan seksen keyl buğday ve yüz sekiz keyl burçağını kabz etmiş idim hâlâ zikr olunan seksen keyl buğdayın beher keyli el-yevm semen-i misli olan ikişer yüz akçeden on altı bin akçeyi vasiyy-i mezbûr el-Hâc Ali’ye edâ ve teslîm ol dahi ahz u kabz edip yüz sekiz keyl burçağın aynı dahi mahallinde vasiyy-i mezbûra teslîme üzerime vâcibdir dedikde gıbbe’t-tasdîki’l-mu‘teber, mâ hüve’l-vâki‘ bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Sahhâf Veli Efendi b. Mehmed, Süleyman b. Abdullah, el-Hâc Mehmed b. Süleyman, Hüseyin b. Abdullah, Mehmed Çelebi b. Süleyman, İbrahim Çelebi b. Ahmed ve gayruhüm mine’l-huzzâr.