Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 382 Hüküm no: 440 Orijinal metin no: [70a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Şaban’ın Boyabat Gökçeağaç köyündeki ev ve tarlasını Ahmed b. Mehmed’e sattığı Fi’l-asl vilâyet-i Anadolu’da Boyabad kazâsına tâbi‘ Gökçeağaç nâm karye ahâlîsinden olup hâlâ mahmiye-i İstanbul’da Yenibahçe kurbunda sâkin Hasan b. Şaban nâm kimesne meclis-i şer‘-i şerîf-i enverde medîne-i mezbûre ahâlîsinden işbu râfi‘ü’l-kitâb Ahmed b. Mehmed nâm kimesne mahzarında ikrâr ve takrîr-i kelâm [edip] akd-i âtî sudûruna değin silk-i mülkümde münselik olup karye-i mezbûrede vâki‘ bir tarafdan Mahmud ve bir tarafdan Hüseyin ve bir tarafdan Ali mülkleri ve bir tarafdan tarîk-i âm ile mahdûd bir çatma oda ve bir ahır ve bahçeyi müştemil çiftlik ta‘bîr olunur mülk menzilimi bi cümleti’t-tevâbi‘ ve’l-levâhık mezbûr Ahmed’e üç esedî guruşa bey‘ ve temlîk ve taht-ı tasarrufunda olup yine karye-i mezbûrede vâki‘ lede’l-ahâlî ma‘lûmü’l-hudûd tahmînen on keyl tohum istî‘âb eder tarlalarımı bâ ma‘rifet-i sâhib-i arz merkūm Ahmed’e on guruş bedel mukābelesinde ferâğ ve tefvîz edip ol dahi iştirâ ve kabûl ve temellük ve tefevvüz eylediğinden sonra semen-i mezbûr ile bedel-i merkūm cem‘an on üç esedî guruşu yedinden tamâmen ahz u kabz edip anları mahallinde zabt ve tasarrufa mezbûru taslît eyledim fîmâ ba‘d zikr olunan çiftlik-i mezbûr Ahmed’in mülk-i müşterâsı ve mârrü’l-beyân tarlalar dâhil-i havza-i tasarrufu olmuşdur benim alâka ve medhalim kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Şaban b. Hasan, Ali b. Mehmed, Receb b. Mehmed, İsmail b. Mehmed, İbrahim b. Osman.