İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 456 Hüküm no: 404 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karakaş Hananya v. Yako ile ortağı İsak v. Menteş’in, Mustafa Ağa b. Osman’a olan borçlarını edaya taahhütleri 100 guruşa sulh ve 1552 buçuk guruşu edâya ta‘ahhüd Ma‘rûz Duhan tüccârından Uzuncaâbad Hasköylü es-Seyyid Mustafa Ağa b. Osman nâm kimesne meclis-i şer‘-i münîrde yine tüccâr-ı merkūmeden Karakaş Hananya v. Yako ve şerîki İsak v. Menteş nâm Yahûdiler muvâcehelerinde tütüncü esnâfının yazıcısı es-Seyyid Mehmed Nuri Efendi hazır olduğu hâlde şerîkân-ı mersûmân Hananya ve İsak Yahûdiler zimmetlerinde beher kıyyesi kırk dörder paraya olarak bundan akdem yedimden ve mâlımdan iştirâken iştirâ ve kabz eyledikleri iki bin sekiz yüz on dokuz vakıyye duhan semeninden üç bin yüz guruş otuz altı para alacak hakkımın yüz otuz dört guruşunu mukaddemâ nakden ve bin beş yüz elli iki buçuk guruşuna mukābil mâllarından beher dânesi yüz seksener paraya olarak işbu meclis-i şer‘de mu‘âyene olunan üç yüz kırk beş aded basma yemenîleri bana bey‘ ve teslîm eylediklerinde ben dahi iştirâ ve tesellüm ve kabz ve semen-i mezkûru duhan semeninden alacağım olan meblağ-ı bâkī-i mezkûrun ol mikdârına takās ve mahsûb edip bâkī şerîkân-ı mesfûrân zimmetlerinde bin dört yüz on dört guruş on altı para alacak hakkım kalmışdı lâkin zikrolunan üç yüz kırk dokuz aded yemenîlerin bey‘ini biz bi’t-terâzî fesh ve ikāle-birle tamamen şerîkân-ı mersûmân Hananya ve İsak Yahûdilere teslîm eylediğimde onlar dahi ba‘de’l-kabz semenleri olan meblağ-ı mezkûr bin beş yüz elli iki buçuk guruşu çend-rûz zarfında bana edâya ta‘ahhüd etmeleriyle mâ‘adâ ancak şerîkân-ı mersûmân zimmetlerinde duhan semeninden bâkī kalan meblağ-ı mezkûr bin dört yüz on dört guruş on altı para müdde‘âmdan bâ-tavassut-ı muslihîn şerîkân-ı mesfûrân ile bi’t-tav‘ ve’r-rızâ yüz guruş bedel-i medfû‘ ve makbûza sulh olduğumda onlar dahi sulh-ı mezkûru ba‘de’l-kabûl ziyâdesine ve ber-vech-i muharrer bana edâya ta‘ahhüd eyledikleri semen-i mezkûr bin beş yüz elli iki buçuk guruşdan mâ‘adâ bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik dediğini mesfûrân Hananya ve İsak Yahûdiler bi-tamamihî tasdîk ve semen-i mezkûr bin beş yüz elli iki buçuk guruş zimmetlerinde müdde‘î-i mezbûr es-Seyyid Mustafa Ağa’ya sahîhan deynleri olduğnu ikrâr ve i‘tirâf ve ber-vech-i muharrer edâya ta‘ahhüd eyledikleri İstanbul Mahkemesi’nden huzûr. Fî 19 min-Za sene 1242 Nüshateyn