İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 462 Hüküm no: 410 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Simaven’in, Hâfız Mehmed Ağa b. Ahmed’e 1316 guruş ödeyeceği Hubûbât semeninden 1316 guruş ilzâm Ma‘rûz Kapan-ı dakīk tüccârından Hâfız Mehmed Ağa b. el-Hâc Ahmed meclis-i şer‘-i münîrde şerîki tüccâr-ı merkūmeden sahib-i arzuhâl Ahmed Ağa b. Ahmed hazır olduğu hâlde habbâz esnâfından İstinye Fırını ustası derûn-ı arzuhâlde ismi mastûr Karabet v. Simaven zimmî muvâcehesinde mersûm Karabet zimmî sene-i sâbıkā Şevvalinde mal-ı müşterekimizden benim yedimden iştirâ ve kabz <> eylediği beher keyli yetmiş beşer paraya olarak beş yüz keyl kokoroz semeninden dokuz yüz otuz yedi buçuk guruş ve beher keyli yüz altmışar paraya olarak iki yüz keyl Arnavud hıntası semeninden sekiz yüz guruş ve beher keyli yüz onar paraya olarak üç yüz keyl Kızılca ta‘bîr olunur hınta semeninden sekiz yüz yirmi beş guruş ki cem‘an iki bin beş yüz altmış iki buçuk guruşun bir def‘ada altı yüz guruşunu ve üç def‘ada dört yüz elli bir guruşunu ve bir def‘ada otuz üç guruşunu ve bir def‘ada dahi yüz guruşunu ki cem‘an altı def‘ada bin iki yüz seksen dört guruşunu bana teslîm edip bâkīsi olan bin üç yüz yetmiş sekiz buçuk guruş el-yevm zimmetinde kalmağla meblağ-ı bâkī-i mezkûr bin üç yüz yetmiş sekiz buçuk guruşu mersûm Karabet zimmîden taleb ederim deyü şerîki hâzır-ı mezbûrun tasdîkiyle da‘vâ ettikde ol dahi cevâbında ol mikdâr Arnabud hıntası ve Kızılca hıntayı fiyât-ı mezkûre üzre iştirâ ve kabzını ve ol mikdâr kokorozu dahi iştirâ ve kabzını ikrâr edip ancak sâlifü’z-zikr kokorozun beher keylini yetmişer paraya iştirâ etmişdim deyü beher keylinde beşer paradan altmış iki buçuk guruşunu inkârından mâ‘adâ teslîmâtım olup kabzını mu‘terif olduğu meblağ-ı mezkûr bin yüz seksen dört guruşdan başka bir def‘ada yüz guruş ve bir def‘ada üç yüz elli guruş edâ ve bâlâda muharrer otuz üç guruş olarak ikrâr eylediği meblağı dahi otuz dört guruş olarak teslîm ve ol vechile dört yüz elli bir guruş ziyâde îfâ etmişdim deyü eylediği def‘ini merkūm el-Hâc Mehmed Ağa inkâr etmekle evvelen müdde‘î-i mezbûr el-Hâc Mehmed Ağa sâlifü’z-zikr beş yüz keyl kokorozun beher keylini beşer para ziyâdeye bey‘ da‘vâsını ve sâniyen dâfi‘-i mersûm Karabet zimmî ziyâde dört yüz elli bir guruş def‘ini tarafeynden her biri isbâta kādirler olamayıp talebleriyle tarafeynden her birine bi’l-muvâcehe vech-i şer‘î üzre yemîn verilmeğin mûcibince müdde‘î-i mezbûr ziyâde da‘vâsıyla mersûm Karabet zimmîye ol dahi def‘-i mezkûruyla merkūm el-Hâc Mehmed Ağa’ya bilâ-beyyine mu‘ârazadan ba‘de’l-men‘ matlûbu olan meblağ-ı merkūm bin üç yüz yetmiş sekiz buçuk guruşun altmış iki buçuk guruşu mersûmun yemîniyle işâ‘ına varılmağın bu sûretde mesfûr Karabet zimmînin ikrârıyla lâzım gelen bin üç yüz on altı guruş mersûmdan tahsîl ve mezbûr el-Hâc Mehmed Ağa’ya teslîm ettirilmek iktizâ eylediği İstanbul Mahkemesi’nden huzûr. Fî-gurreti Zilhicceti’ş-şerîfe sene 1242