İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 463 Hüküm no: 411 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizci Hüseyin b. Süleyman’ın, Ömer Kaptan b. Hasan’a olan 850 guruş alacak davasını geri çektiği 850 guruşdan ibrâ Ma‘rûz Mellâh tâifesinden sahib-i arzuhâl Hüseyin <> b. Süleyman nâm kimesne meclis-i şer‘-i münîrde derûn-ı arzuhâlde mezkûru’l-ism el-Hâc Ömer Kaptan b. Hasan muvâcehesinde zikri âtî sefînenin mâliki el-Hâc Mehmed Ağa b. el-Hâc Mahmud hazır olduğu hâlde hâzır-ı mezbûrun mülkü olup mezbûr el-Hâc Ömer Kaptan’ın süvâri olduğu ibrik ta‘bîr olunur bir kıt‘a sefîne bundan akdem Donanma-yı hümâyûn Akdeniz’e giderken Tersâne-i âmireden zehâir <> tahmîli’çün istîcâr olunduğu esnâda merkūm el-Hâc Ömer Kaptan beni ücret-i ma‘lûme ile istîcâr ve sefîne-i merkūmeye mellâh nasb ve irsâl edip ben dahi on altı ay hidmet etmemle müddet-i mezkûrede ecr-i müsemmâmdan müctemi‘ olan meblağdan gayrı-ez teslîmât merkūm el-Hâc Ömer Kaptan zimmetinde sahhu’l-bâkī sekiz yüz elli guruş alacağım vardır deyü da‘vâya tesâddî etmişdim el-hâletü hâzihî ben da‘vâ-yı mezkûremden meccânen fâriğ olup bi’l-cümle hukūk-ı şer‘iyeye müte‘allika âmme-i da‘vâdan merkūm el-Hâc Ömer Kaptan ile hâzır-ı mezbûr el-Hâc Mehmed Ağa’nın zimmetlerini kabûllerini hâvî ibrâ ve ıskāt eyledim deyü ikrâr ve tesâdukları İstanbul Mahkemesi’nden huzûr. Fî 29 min-Za sene 1242