İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 464 Hüküm no: 412 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Said Ağa b. Süleyman’ın, Said Ağa b. Sasî ile Salim Sasi’yi, Salih Ağa b. Hammude’ye havale ettiği Fesçilerin havâlesi Ma‘rûz Âsitâne-i aliyyede vâki‘ fesçi <> esnâfının sâbık kethudâsı Said Ağa b. Süleyman meclis-i şer‘-i münîrde hâlâ kethudâ Salih Ağa b. Hammûde muvâcehesinde sâbıkā baş ihtiyâr Said Ağa b. Sasî ve Sâlim b. Sasî nâm kimesneler hazır oldukları hâlde ben mukaddemâ esnâf-ı merkūme kethudâsı iken hâzırân-ı mezbûrân Said Ağa ve Sâlim’in yedimden ve mâlımdan iştirâ ve kabz eyledikleri ma‘lûmü’l-aded ve’l-fiyât envâ‘-ı fes esmânından ba‘de külli’l-hesâb gayrı-ez teslîmât sahhu’l-bâkī merkūm Said Ağa zimmetinde dokuz yüz altmış iki guruş ve mezbûr Sâlim zimmetinde dahi iki bin yüz guruş ki cem‘an üç bin altmış iki guruş alacağım ve kethudâ-yı lâhık-ı mezbûr [78a] Salih Ağa’ya dahi ol mikdâr deynim olmağla ben alacağım olan meblağ-ı mezkûru deyn-i mezkûruma mahsûben edâ etmek üzre dâyinim kethudâ-yı lâhık-ı mezbûr Salih Ağa’yı medyûnlarım hâzırân-ı mezbûrân Said Ağa ve Sâlim üzerlerine işbu meclis-i şer‘de şerâiti üzre havâle-i mukayyede ile havâle ve her birimiz havâle-i mezkûreyi kabûl edip ol vechile ben alacağım olan meblağ-ı mezkûr üç bin altmış iki guruşu hâzırân-ı mezbûrândan ve kethudâ-yı merkūm Salih Ağa dahi ol mikdâr alacağını benden her birimiz istifâ edip ber-vech-i bâlâ merkūm Said Ağa’nın dokuz yüz altmış iki guruş ve merkūm Sâlim’in dahi iki bin yüz guruş zimmetlerinde kethudâ-yı lâhık-ı mezbûr Salih Ağa’ya cihet-i havâle-i mezkûreden deynleri olmağla meblağayn-i mezkûreynden mâ‘adâ hâzırân-ı merkūmân zimmetlerinde gerek benim bir gûne hakkım ve gerek <> esnâfca dahi bir hesâbımız kalmayıp onların dahi benim yed ve zimmetimde bir vechile da‘vâ ve nizâ‘ları yokdur deyü takrîrini mezbûr Salih Ağa ile hâzırân-ı mezbûrân Said Ağa ve Sâlim’den her biri tasdîk eyledikleri İstanbul Mahkemesi’nden huzûr. Fî 17 min-Za sene 1242