İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 464 Hüküm no: 413 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Revanî Çelebi Mescidi’nin imamet ve müezzinliğinin Halil Halife b. Salih üzerinde olduğu Revânî Çelebi Mescid-i şerîfinin imâmet ve müezzinlik cihetleri husûsu Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda nezâret-i dâ‘îlerinde olan evkāfdan İstanbul’da Kırk Çeşme nezdinde vâki‘ merhûm Revânî Çelebi Mescid-i şerîfinin imâmet ve müezzinlik ve aşir-hânlık cihetlerine bâ-berât-ı âlî-şân mutasarrıf olan es-Seyyid Halil Halîfe b. Salih otuz dokuz senesi hâcc-ı şerîfe gider oldukda cihât-ı mezkûreyi oğlu Mustafa Efendi’ye kasr-ı yed etmiş ise de merkūm Mustafa Efendi diyâr-ı âhara gidip hayat ve memâtı nâ-ma‘lûm olduğundan mescid-i şerîf-i mezkûr mesdûd ve hidmet-i lâzımesi mu‘attal kaldığından bahisle cihât-ı mezkûre merkūm Mustafa Efendi’nin ref‘inden babası mezbûr es-Seyyid Halil Halîfe’ye tevcîh olunmasını mahalle-i mezbûre ahâlîsi istid‘â eyledikleri mefhûm-ı arzuhâlden müstebân olup lâkin hâmiş-i arzuhâlde mastûr küçük evkāf muhâsebesi derkenârında cihât-ı mezkûreye el-yevm mezbûr es-Seyyid Halil Halîfe’nin üzerinde olup merkūm Mustafa Efendi’ye tevcîh olunduğunun kaydı bulunmamağla keyfiyeti etrâfıyla tahkīk için mahalle-i mezbûre ahâlîsi olan el-Hâc Halil Efendi ve Hasan Efendi ve el-Hâc Hüseyin Efendi ve Süleyman Efendi ve Hasan Ağa ve sâir cemâ‘at-i Müslimîn huzûr-ı şer‘e celb ile suâl olundukda mezbûr es-Seyyid Halil Halîfe cihât-ı mezkûreyi ancak nâzır-ı vakf huzûrunda kasr-ı yed edip henüz tevcîh-i sultânî olunmadığını ve sahib-i evveli mezbûr es-Seyyid Halil Halîfe muhtâr-ı cemâ‘at olup her vechile imâmete ehil olduğunu ihbâr etmeleriyle bu sûretde tevcîh-i sultânî bulunmadıkça yalnız mutasarrıfının ferâğı mu‘teber olmamağla cihât-i mezkûreyi kemâ-kân bâ-berât-ı âlî mutasarrıfı mezbûr es-Seyyid Halil Halîfe dâ‘îlerinin zabt ve tasarrufu iktizâ eylediği İstanbul Mahkemesi’nden huzûr. Fî-gurreti Z sene 1242