Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 383 Hüküm no: 441 Orijinal metin no: [70a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mustafa’yı döverek vefatına sebep olan bostancıların merhumun vârisleriyle diyet ödeyerek sulh oldukları Vilâyet-i Anadolu’da Gemlik kazâsına tâbi‘ Büyükkumla nâm karye sâkinlerinden iken bundan akdem vefât eden Mehmed b. Mustafa’nın verâseti vâlidesi Emine bt. Ahmed nâm hâtun ile li ebeveyn karındaşı Ahmed[‘e] münhasıra olduğu şer‘an zâhir ve mütehakkik oldukdan sonra mezbûrân Emine ve Ahmed meclis-i şer‘-i şerîfde Hadîka-i hâssa bostanîleri hasekilerinden işbu bâ‘isü’l-kitâb Mustafa Haseki b. Ahmed ve Ali Haseki b. Ahmed ve Çukadâr Musa b. ( ) mahzarlarında her biri ikrâr ve takrîr-i kelâm edip mezbûrdan Mustafa Haseki ve Ali Haseki ve Çukadâr Musa bundan akdem bir husûs için karye-i mezbûreye geldiklerinde sen bir kimesnenin bağını kat‘ etmekle müttehemsin deyû mû[ri]simiz mezbûr Mehmed’i ahz u kabz ve darb ve cerîme nâmıyla otuz guruşu kabz eylediklerinden sonra mûrisimiz mezbûr Mehmed merkūm[û]nun darblarından nâşî fevt olmuşdur deyû meblağ-ı mezbûr otuz guruş ile müteveffâ-yı mezbûr Mehmed’in dem ve diyetini mezbûr[ûn]dan Mustafa Haseki ve Ali Haseki ve Çukadâr Musa’dan taleb ve da‘vâ eylediğimizde anlar dahi bi’l-külliye inkâr etmekle beynimizde nizâ‘-ı küllî vukū‘undan sonra muslihûn tavassut edip da‘vâ-yı mezkûremizden biz dahi ber vech-i muharrer sulh-i mezbûru kabûl ve bedel-i sulh olan meblağ-ı mezbûr on guruşu yedlerinden tamâmen ahz u kabz edip meblağ-ı mezbûr ve mûrisimiz müteveffâ-yı mezbûrun dem ve diyetine müte‘allika âmme-i da‘vâdan mezbûr Mustafa Haseki ve Ali Haseki ve Çukadâr Musa’nın zimmetlerini ibrâ-i âmm-ı kātı‘ü’n-nizâ‘ ibrâ ve iskāt eyledik husûs-i mezbûra müte‘allika merkūmûn ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Abdi Haseki b. Mehmed, Ahmed b. Süleyman Kumlalı, Hüseyin Haseki, Mustafa Çavuş, Bahçe Ustası.