İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 467 Hüküm no: 415 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salon v. Aron’un, kazzaz gediğini 3000 guruşa Menahim v. İsak’a sattığı Kazzâz mübâya‘ası Ma‘rûz Kazzâz esnâfından Hekîm oğlu Salon v. Aron Yahûdî meclis-i şer‘-i hatîrde esnâf-ı merkūmeden Menahim v. İsak nâm Yahûdî muvâcehesinde kazzâz esnâfının kethudâsı Abdüllatif Ağa tarafından mürsel yiğitbaşı Molla Mehmed hazır olduğu hâlde takrîr-i kelâm edip İstanbul’da Çarşı-yı Kebîr’de Derziler zukāğında sarrâf köşesinden hayyâtîne müntehî oluncaya değin sûk tarafeyninde vâki‘ dekâkînden Kazzâz Ohan [v.] Kigork zimmî dükkânı ittisâlinde kâin bir bâb kazzâz dükkânı derûnunda mevcûde beyne’l-enâf gedik ta‘bîr olunur bâ-sûret mâlik olduğum âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm Menahim Yahûdiye üç bin guruş semen-i makbûza bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt etmemizle fîmâ-ba‘d âlât-ı gedik-i mezkûr mersûm Menahim Yahûdinin mal-ı müşterâsı ve hakk-ı sırfı olup benim kat‘a alâkam kalmamışdır deyü ba‘de’l-ikrâr ve’t-tasdîk gedik-i mezkûrun bâyi‘-i mersûm Salon Yahûdî ismine olan kaydı ref‘ ve terkīn ve atîk sûreti battalda hıfz ile müşteri-i mersûm Menahim Yahûdî ismine tashîhan kayd ve yedine müceddeden sûret i‘tâsını istid‘â eyledikleri İstanbul Mahkemesi’nden huzûr. Fî 17 min-Za sene 1242