Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 383 Hüküm no: 442 Orijinal metin no: [70b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermeni patriği Karabet v. Ramor’un Meryem Ana Kilisesi papazı Kevork v. Mardiros’u papazlıktan ihraç etmesi Mahmiye-i İstanbul’da vâki‘ Ermeni tâifesinin patrikleri olan bâ‘isü hâze’l-vesîka Karabet v. Ramor nâm râhib meclis-i şer‘-i şerîf-i enverde yine tâife-i mezbûreden Kevork v. Mardiros nâm Ermeni muvâcehesinde üzerine da‘vâ ve takrîr-i kelâm edip mezbûr Kevork mukaddemâ Meryem Ana kilisesi sâ[kin]lerinden olup lâkin tâife-i mezbûrdan zî-mâl olanlardan mücerred celb-i mâl için kiminden akçe ve kimindense ba‘zı eşyâ da‘vâ ve mezbûr papazların azli benim re’y [ve] ma‘rifetimle olup bana müte‘allik umûrda mezbûrlar bana mu‘âraza etmemek yedimde olan berât-ı şerîf-i âlîşânda mastûr ve müsadda[k] olmağla mezbûrun şirret ve fesâdından uhdeme edâsı lâzım gelen mâl-ı mîrîyi tahsîlden âciz kalıp papazlıkdan mezbûru men‘ ve kadîmü’l-eyyâmdan beynimizde cârî âdetimiz üzre kilise-i mezkûreye müdâhaleden nehy etmiş iken bir vechile memnû‘ ve ma‘zûl olmamağla nizâm-ı hâlimiz bi’l-külliye muhtel olmağın mezbûr Kevork’un keyfiyyet-i hâli istikşâf olunup haberleri tahrîr olunması matlûbumdur dedikde tâife-i Ermeniyândan Agop v. Gerçek ve Sahak v. Meldon ve Kasper v. (….) ve Agop v. Kirkor ve Bogos v. Minas ve Ovanes v. Agop ve Agop v. Sefer ve Serkis v. Aritun ve Bogos v. Aritun ve Agop v. Anastas ve Mihayil v. Serkis ve Seratyon v. Hüdâverdi ve Abraham v. Sahak ve Kirkor v. Markar ve Agop v. Gerçek ve Serkis v. Agop ve Kalif v. Dador ve Serkis v. Markar ve Arakil v. Şahadır ve sâirleri fi’l-hakīka mezkûr Kevork bâlâda şerh ve beyân ve tafsîl ve ayân olunan minvâl üzre dâimâ mücerred kendi nef‘î için kiminden bi gayri hakkın akçe da‘vâ edip her-bâr şirret ve bunun emsâli ta‘bîr-i da‘vâdan hâlî değildir deyû mezbûrun sû-i hâlini her biri haber verdiklerinden sonra mezbûr Kevork dahi meclis-i şer‘de mârrü’l-beyân papazlıkdan kasr-ı yed ve fîmâ ba‘d patriklere müte‘allika olan umûra müdâhale etmemeği iltizâm etmemeğin işbu vesîka hıfzan li’l-makāl ketb olundu. Fî evâili Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Çelebi b. el-Hâc Ahmed, Mustafa Çelebi b. Abdurrahman, el-Hâc Mustafa b. Tevekkül, İbrahim Çelebi b. Ahmed, Mehmed b. İdris, Ali b. Bâli.