İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 480 Hüküm no: 431 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Selim ile eşi Esma bt. Ömer’in, muaşeretlerine müdahalenin men edildiği Zevci ile hüsn-i mu‘âşerete tenbîh Ma‘rûz İstanbul’da Davud Paşa kurbünde Kasab İlyas mahallesinde sâkine zâtı mu‘arrefe Hadîce bt. Ömer nâm hatun meclis-i şer‘-i münîrde dâmadı derûn-ı arzuhâlde ismi mezkûr Simkeş es-Seyyid Ahmed b. es-Seyyid Selim muvâcehesinde mezbûr es-Seyyid Ahmed’in babası merkūm es-Seyyid Selim ve vâlidesi zâtı mu‘arrefe Ümmühan bt. Ahmed ve eniştesi Tatar Abdi Ağa b. Osman hazır oldukları hâlde mezbûr es-Seyyid Ahmed on bir yaşında sadriye mürâhıka kızım hâzıra bi’l-meclis Esma bt. Ömer’in zevc-i dâhili olup beynlerinde hüsn-i ülfetleri dahi var iken hâmiş-i arzuhâlde mastûr reisü’l-etibbâi’s-sultânî semâhatlü fazîletlü efendi hazretlerinin i‘lâmlarında bast olunduğu üzre merkūm galebe-i nicâr-ı sevdâ ile kendüye tefekkür-i gayrı mülâyim ve sükûn geldiğine ve fakīru’l-hâl olduğuna binâen mufârakat dâ‘iyelerinde olunmuş ise de kendileri birbirinden hoşnûd olup âbâ ve ümmühâtın tahrîk ve iğvâlarıyla olduğu lede’ş-şer‘i’l-enver zâhir ve bu keyfiyet hilâf-ı şer‘-i şerîf olmağla men‘ olunup hüsn-i mu‘âşeretleri husûsuna müdâhale olunmamak iktizâ eylediği taraf-ı şer‘-i şerîfden bize tefhîm olundukda dâmad-ı mezbûr dahi bana mâhiye ancak on beşer guruş vermek ve kendi dahi menzilime gelip kızım mezbûre ile ma‘an sâkine olmak üzre râzı ve ben dahi ol mikdâr ile ikisini idâreye müte‘ahhide olup gerek ben ve gerek hâzırûn-ı mezbûrûndan her birimiz zevcân-ı mezbûrânın hüsn-i imtizâclarına müdâhale etmemeye ahd-i mîsâk eyledik deyü ikrâr ve tesâdukları İstanbul Mahkemesi’nden huzûr. Fî 23 min-Z sene 1242