Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 384 Hüküm no: 443 Orijinal metin no: [70b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Serkis v. Moçuk’un Mustafa b. İsmail’e olan borcunu ödemiş olduğu Mahmiye-i İstanbul’da Mustafa Bey mahallesinde sâkin Mustafa b. İsmail nâm kimesne meclis-i şer‘-i hatîr-i lâzımü’t-tevkīrde Koca Mustafa Paşa kurbunda ekmekçi olan Serkis v. Moçuk nâm zimmî muvâcehesinde üzerine da‘vâ ve takrîr-i kelâm edip mezbûr Serkis zimmetinde yedimden müşterâ ve makbûz her keyli iki yüz yirmi beş akçeye olmak üzre yirmi keyl buğday bahâsından dört bin beş yüz akçe hakkım olmağla suâl olunup meblağ-ı mezbûru bana edâ ve teslîme tenbîh olunmak murâdımdır dedikde gıbbe’s-suâl mezbûr Serkis cevâbında fi’l-hakīka müdde‘î-i mezbûra ber vech-i muharrer cihet-i mezbûreden dört bin beş yüz akçe deynim olup lâkin meblağ-ı mezbûru bundan akdem kendiye tamâmen edâ ve teslîm eyledim deyû def‘le mukābele edicek gıbbe’l-istintâk ve akībe’l-inkâr, mezbûr Serkis’den def‘-i mezbûruna beyyine taleb olundukda udûl-i ricâlden olup mahmiye-i mezbûrede Canbâziye mahallesi sâkinlerinden Mustafa b. İbrahim ve Hasan b. Osman nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Serkis müdde‘î-i mezbûr Mustafa’nın müdde‘âsı olan dört bin beş yüz akçeyi bizim huzûrumuzda edâ ve teslîm ol dahi bizim huzûrumuzda yedinden tamâmen ahz u kabz eyledi bizler bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle müdde‘î-i mezbûr merkūm Serkis’e bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, Abdullah Efendi el-Kâtib, Mahmud b. Mustafa.