İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 483 Hüküm no: 435 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohannes v. Serkiz ile eşinin, komşuları Antran bt. Neccâr Tanil’i evleri arasındaki kuyuyu kullanmaktan men etmeyecekleri Bi’r-i mâ keşfi Ma‘rûz Sâdır olan fermân-ı âlîlerine imtisâlen husûs-ı âti’l-beyânı mahâllinde lede’l-mu‘âyene keşf ve tahkīk için kıbel-i şer‘-i şerîfden me’zûnen irsâl olunan Kâtib es-Seyyid Ahmed Ataullah Efendi dâ‘îleri [ve] hâssa mi‘mârı hulefâsından es-Seyyid Mehmed Râşid ve diğer es-Seyyid Mehmed Râşid Halîfeler ile nezâret-i dâ‘îlerinde olan evkāfdan ashâb-ı hayrâtdan merhûm Kapıcı-zâde Mehmed Efendi Vakfı müsakkafâtından İstanbul’da Darbhâne-i atîk kurbünde Çoban Çavuş mahallesinde vâki‘ bir tarafdan Sarrâf Avadik zimmî menzili ve bir tarafdan Hamamcı Erzurumlu Ohannes v. Serkiz zimmî ile zevcesi Ağisa bt. Esîrci Eskander Nasrâniyenin bi’l-münâsafa tasarruflarında olan zikri câ’î müfrez menzil ve bir tarafdan Hamamcı oğlu Bogos zimmî bağçesi ve taraf-ı râbi‘i tarîk-ı âm ile mahdûd ve şehriye otuz akçe icâre-i müecceleli bir bâb menzile varıp huzûr-ı Müslimînde akd-i meclis-i şer‘-i âlî ettikde menzil-i mahdûd-ı mezkûra bâ-temessük-i mütevellî bi’l-icâreteyn müstakilleten mutasarrıfe olan sahibe-i arzuhâl mu‘arrefetü’ş-şahs Antran bt. Neccâr Tanil Nasrâniye meclis-i ma‘kūd-ı mezkûrda vakf-ı mezkûrun mütevellîsi el-Hâc Halil Efendi b. el-Hâc Mehmed nâm kimesne ile mersûme Antran Nasrâniyenin güveğisi Donik v. İzmirli oğlu Manuk ve mahalle-i mezbûre ahâlîsinden ve müsinn ü ihtiyâr re‘âyâdan Derzi Minas v. İsayel ve Oturakçı Kiryos v. Tavit ve Şârşûbeci Bağdısar v. Agop nâm zimmîler hazır oldukları hâlde meznil-i mahdûd-ı mezkûrun zukāk kapısından girerken sağ cânibinde olup ittisâlinde kâin kezâlik vakf-ı mezkûr müsakkafâtından şehriye otuz akçe icâre-i müecceleli ma‘lûmü’l-hudûd ve’l-müştemilât bir bâb müfrez menzile iki kıt‘a temessük mantûklarınca bi’l-icâreteyn münâsafaten mutasarrıflar olan zevcân-ı mersûmân Ohannes zimmî ile kezâlik şahsı mu‘arrefe Ağisa Nasrâniye muvâcehelerinde benimle zevcân-ı mersûmânın ber-vech-i muharrer mutasarrıflar olduklarımız menzillerimiz fi’l-asl fakat bir aded bi’r-i mâyı müştemil bir bâb menzil iken altmış sene mukaddem mutasarrıfları ol târihde mütevellîsinin izniyle iki bâb menzil olarak ifrâz eylediklerinde bi’r-i mâ’-i mezkûr dahi menzileyn-i mezkûreyn beynlerinde vâki‘ olduğundan ber-vech-i iştirâk isti‘mâl olunarak târih-i merkūmdan beri menzileyn-i mezkûreynin gerek mutasarrıf-ı sâbıkları ve ba‘dehû gerek benimle zevcân-ı mersûmân bi’r-i mâ’-i mezkûru yedimde olan atîk mütevellî temessükü mantûkunca bilâ-nizâ‘ ber-minvâl-i muharrer iştirâken isti‘mâl ve intifâ‘ edegelir iken bu def‘a zevcân-ı mersûmân Ohannes zimmî ile Ağisa Nasrâniye beni bi-gayr-ı hakkın bi’r-i mâ’-i mezkûru isti‘mâl ve intifâ‘dan men‘ etmeleriyle mümâna‘atları men‘ ü def‘ olunmak matlûbumdur deyü mütevellî-i hâzır-ı merkūm el-Hâc Halil Efendi’nin tasdîkiyle da‘vâ ettikde onlar dahi cevâblarında bi’r-i mâ’-i mezkûr eğerçi menzileyn-i merkūmeyn beynlerinde vâki‘ olup kadîmden beri menzileyn-i mezkûreyn mutasarrıfları iştirâken isti‘mâl edegelmişler ise de bizim yedimizde olan mütevellî temessükünde müşterek lafzı [82a] zikrolunmamış olmağla öyle olıcak bi’r-i mâ’-i mezkûrun mecmû‘unu biz zabtederiz dediklerinde istikşâf-ı hâl için husûs-ı mezkûr hâzırûn bi’l-meclis olan mazbûtü’l-esâmî Müslimîn ve zimmiyûn-ı mesfûrûndan suâl olundukda fi’l-hakīka bi’r-i mâ’-i mezkûr kadîmden beri menzileyn-i mezkûreynin sâbık ve lâhık mutasarrıfları bilâ-nizâ‘ ber-vech-i iştirâk isti‘mâl ve intifâ‘ <> ede <> geldiğini her biri bi’l-muvâcehe alâ-tarîkı’ş-şehâde ba‘de’l-ihbâr muslihûn tavassutuyla beynleri te’lîf ve tanzîm olunup zevcân-ı mersûmân Ohannes zimmî ve Ağisa Nasrâniyeden her biri fîmâ-ba‘d müdde‘iyye-i mesfûre Antran Nasrâniyenin bi’r-i mâ’-i mezkûr kadîm üzre iştirâken isti‘mâl ve intifâ‘ına mümâna‘at etmemeğe ta‘ahhüd eylediklerinde mersûme Antran Nasrâniye dahi kendi mâlından teberru‘an li’l-vakf bi’r-i mâ’-i mezkûrun el-yevm üzerinde olan bilezik taşı sagīr olduğundan bi’r-i mâ’-i mezkûrun mevcûd bilezikini ref‘-birle müceddeden mi‘mârân-ı mezbûrân misâhalarıyla bir zirâ‘ tûlünde ve nısf zirâ‘ arzında kûfekî bilezik ve iki aded çıkrık vaz‘ıyla menzileyn-i mezkûreynin makarr-ı nisvân olan mahallerini setr için nısfdan taban tahtına çıkınca omurgadan kuşaklı Eğricek tahtasından perde inşâ<>sına ta‘ahhüd ve her biri ber-vech-i muharrer âharın ta‘ahhüdünü kabûl edip bu vechile kat‘-ı münâza‘a eylediklerini kâtib-i mezbûr dâ‘îleri mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘-i şerîfe gelip alâ-vukū‘ihî inhâ ve takrîr eylediği İstanbul Mahkemesi’nden huzûr. Fî 18 min-Z sene 1242