İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 486 Hüküm no: 437 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. İsmail’in, teyzesinin vefatıyla Mustafa Ağa Vakfı tevliyetine talip olduğu Tevcîh-i tevliyet Ma‘rûz Ber-mantûk-ı kayd nezâret-i dâ‘iyânemde vâki‘ merhûm el-Hâc Mustafa Ağa Vakfı tevliyetine meşrûtiyyet üzre bâ-berât-ı âlî-şân mutasarrıfe olan Hafize Hatun bt. İsmail bundan akdem fevt olup tevliyet-i mezbûreye evlâd-ı vâkıfdan bilâ-berât evvelâ Fâtıma ba‘de vefâtihâ Nefise mutasarrıflar olduklarından sonra mezbûretân dahi bilâ-veled müte‘âkiben vefât eylediklerinden bahisle sahib-i arzuhâl es-Seyyid Mahmud b. İsmail müteveffât-ı ûlâ Hafize Hatun’un hemşîre-zâdesi olduğunu iddi‘â-birle tevliyet-i müteveffeyât-ı mezbûrâtın mahlûllerinden kendüye tevcîh buyurulmasını istid‘â ve Mollagürânî ahâlîsinden Kavruk Tekyesi Şeyhi eş-Şeyh Mahmud Efendi b. es-Seyyid Nu‘man Efendi ve müderrisînden Mustafa Efendi b. Ahmed Efendi ve Berber Mustafa Ağa b. Ahmed ve Kavukçu Ali Ağa b. Abdullah nâm kimesneler fi’l-hakīka sahib-i arzuhâl merkūm müteveffât-ı ûlâ Hafize Hatun’un li-ebeveyn hemşîresi Zeliha bt. İsmail’in oğlu olup tevliyet-i mezbûreye merkūmdan gayrı müstehıkk-ı âharı olduğu ma‘lûmumuz değildir deyü alâ-tarîkı’ş-şehâde haber vermeleriyle alâ-mûcibi’l-ihbâr tevliyet-i mezbûre müteveffât-ı mezbûre Hafize Hatun’un mahlûlünden sahib-i arzuhâl merkūm es-Seyyid Mahmud’a tevcîh ve yedine berat-ı âlî-şân ihsân buyurulmak bâbında emr u fermân hazret-i men-lehu’l-emrindir. Fî 27 Z sene 1242