İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 487 Hüküm no: 438 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. İsmail’in, komşusu Hüseyin Ağa b. Ali’nin kendi dükkânından yaptığı ilaveden el çekmesini istediği Oturakçı dükkânı keşfi Ma‘rûz Sâdır olan fermân-ı âlîlerine imtisâlen zikri âtî husûsun mahâllinde lede’l-mu‘âyene keşf ve tahkīki’çün savb-ı şer‘-i enverden irsâl olunan Kâtib es-Seyyid Ahmed Efendi dâ‘îleri [ve] hâssa mi‘mârı hulefâsından es-Seyyid Abdülkadir ve İsmail Zühdü Halîfeler ile nezâret-i dâ‘îlerinde olan evkāfdan merhûm Molla Hüsrev Efendi Vakfı’ndan İstanbul’da Çarşı-yı Kebîr’de Bat Pazarı’nda Külyedi ta‘bîr olunur mahâlde köşede vâki‘ zikri âtî münâza‘un-fîh olan oturakçı dükkânlarına varıp mazbûtü’l-esâmî Müslimîn huzûrlarında akd-i meclis-i şer‘-i âlî ettikde mîrî münâdîlerinden sahib-i arzuhâl Hasan Ağa b. İsmail meclis-i ma‘kūd-ı mezkûrda Hüseyin Ağa b. Ali nâm kimesne muvâcehesinde müdde‘î-i mezbûr Hasan Ağa’nın iki bâb dükkânında müste’cirleri Mustafa Ağa b. Hüseyin ile şahsı mu‘arrefe Takohi bt. Ohannes Nasrâniye ve merkūm Hüseyin Ağa’nın bir bâb dükkânında müste’ciri Ahmed Efendi b. el-Hâc Abdullah nâm kimesneler hazır oldukları hâlde sâlifü’z-zikr üç bâb dükkân bir kemer tahtında olup beynleri tahta perde ile fâsıl olarak isti‘mâl olunur iken bundan akdem vukū‘ bulan harîkde muhterik olup ba‘dehû mezbûr Hüseyin Ağa dükkânını evvelce binâ eylediğinden benim dükkânlarımın arzan yedi ve on beş parmak mahâllini kendi dükkânına ilâve etmekle keff-i yedine tenbîh olunmasını da‘vâ eylediğimde ol dahi tasdîk ve keff-i yed-birle kat‘-ı nizâ‘ eyledik deyü takrîr ve tasdîklerini kâtib-i merkūm mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr. Fî 7 Z sene [12]42