İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 488 Hüküm no: 439 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Reis b. Feyzullah’ın, gemi inşası niza’ında Keresteci Süleyman Ağa b. Halil ile 3000 guruşa sulh olduğu Sefîne maddesinden 3000 guruşa sulh Ma‘rûz Sâdır olan fermân-ı âlîlerine imtisâlen zikri câ’î husûsu ber-nehc-i şer‘î istimâ‘ ve fasl u hasm için savb-ı şer‘-i enverden me’zûnen irsâl olunan Kâtib es-Seyyid Salih Afîf Efendi dâ‘îleri mahmiye-i İstanbul’da Kapan-ı dakīkde vâki‘ nâib efendilere mahsûs çardak ta‘bîr olunur mahalle varıp hâlâ kapan nâibi eşrâf-ı kuzât-ı kirâm-ı zevi’l-ihtirâmdan fazîletlü Mehmed Nuri Efendi ve Tersâne-i âmire baş mi‘mârı Mehmed Efendi ve kethudâ-yı mi‘mârân-ı Tersâne-i âmire Mahmud Kethudâ ve Mi‘mâr Hasan Halîfe ve reisler kethudâsı es-Seyyid el-Hâc Veliyüddin Ağa ve kapan-ı mezbûr tüccârından Kozlucalı-zâde el-Hâc İsmail Ağa ve sâir mazbûtü’l-esâmî Müslimîn huzûrlarında akd-i meclis-i şer‘-i nebevî ettikde sefîne reislerinden sahib-i arzuhâl İvrineli Mehmed Reis b. Feyzullah meclis-i ma‘kūd-ı mezkûrda derûn-ı arzuhâlde mezkûru’l-ism Keresteci el-Hâc Süleyman Ağa b. Halil muvâcehesinde sene-i sâbıkada Âsitâne-i aliyyeye hatab nakli’çün Balkapanı tüccârının müceddeden inşâ ettirmeleri husûsuna irâde-i seniyye ta‘alluk eden çekleve ta‘bîr olunur bir kıt‘a sefîneyi inşâya kapan-ı mezbûrun mazbûtü’l-esâmî ve mahsûrü’l-eşhâs fermânlı tüccârı taraflarından merkūm el-Hâc Süleyman Ağa’yı tevkîl etmeleriyle ol dahi Bahr-i Siyah’ın Anadolu cânibinde kâin kayık istisnâ‘ı müte‘âref olan Filyoz İskelesi’nde ta‘rîf ve tavsîfi vechile kendi keresten ile bir kayık tasnî‘ ettir masrûfunu ve hidmetin mukābelesinde dahi yevmiye beşer guruş ücretini vereyim deyü kabûlümü hâvî bana emr ve sefîne-i mezkûrenin dahi kırk sehmden beş sehm hissesini tüccârı merkūmûndan sana teberru‘ ettireyim deyü va‘d etmeğin ben dahi merkūm el-Hâc Süleyman Ağa’nın emr-i mezkûruna binâen iskele-i mezkûreye varıp mâlımdan ber-vech-i muharrer bi-şartı’r-rücû‘ emriyle yedimde olup şey’en-fe-şey’en muharrer olan müfredât defteri mantûkunca yirmi bin guruş sarf ve üç yüz gün hidmet ile bir kıt‘a çekleve inşâ ve Dersa‘âdet’e getirip kendüye teslîm < > eylediğimde ol dahi beğenip ahz ettikden sonra masrûf-ı mezkûrumun ceste ceste on altı bin sekiz yüz seksen üç guruşunu nakden ve havâleten kabz ve istifâ etmemle bâkīsi olan üç bin yüz on yedi guruş ile müddet-i mezkûrede ecr-i müsemmâm olan bin beş yüz guruş ki cem‘an dört bin altı yüz on yedi guruşunu merkūm el-Hâc Süleyman Ağa’dan taleb <> ve da‘vâ eylediğimde evvelen takrîr-i meşrûhum üzre merkūmun va‘d-i mücerredine binâen sefîne-i mezkûreden hisse mutâlebem meşrû‘â olmadığı bana ba‘de’t-tefhîm masrûf-ı mezkûr husûsunda merkūm Süleyman Ağa istintâk olundukda mesârif-i mezkûre ol mikdâr olduğunu tasdîk etmeyip ihtilâf olunmağla bi’l-cümle me’mûrîn ile hâlâ Ayazma İskelesi’nde merbût sefîne-i mezkûre üzerine varılıp mi‘mâr-ı mezbûrûn ma‘rifet ve misâhalarıyla keşf ve tahmîn ettirildikde sefîne-i mezkûre bi-hesâb-ı hendese otuz altı zirâ‘ olup ber-muktezâ-yı fenn-i mi‘mârî-i deryâ cemî‘ esâs ve müştemilâtı müstahkem olarak bilâ-kusûr yapılmış ve mi‘mâr-ı merkūm Hasan Kalfa dahi bu sene ol sâhilde beylik kalyon inşâ ettirip henüz gelmiş olduğundan her vechile vukūfu olmağla el-yevm ol tarafda kerestenin fiyâtına ve umûmen verilmekde olan amele ücretine nazaran hakk-ı va‘di üzre hesâb olunarak yirmi bir bin altı yüz guruş takdîm olunmuş ise de tarafeynin takrîrlerine göre hîn-i teslîminde ba‘zı eczâsı nâkıs olduğundan noksanı’çün beher zirâ‘ında on yedişer guruşdan cem‘an altı yüz on iki guruşu lede’t-tenzîl mâ‘adâ yirmi bin dokuz yüz seksen sekiz guruş ile ancak vücûda gelip noksan ile tasnî‘ ve i‘mâli mümkün olamayacağını mi‘mâr ve tüccâr-ı merkūmûn bi’l-ittifâk ihbâr ve ol vechile beynimizde ba‘de vukū‘ı’l-münâza‘a muslihûn tavassutuyla beynimiz ıslâh olunup ben ber-vech-i muharrer tesâddî eylediğim dört bin altı yüz on yedi guruş müdde‘âmdan bâ-tavassut-ı muslihîn merkūm el-Hâc Süleyman Ağa ile bi’t-tav‘ ve’r-rızâ üç bin guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı merkūm üç bin guruşdan mâ‘adâ ziyâde müdde‘âma ve bi’l-cümle husûs-ı mezkûra ve sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı merkūm üç bin guruşun bi’t-taleb müdde‘î-i mezbûra edâsıyla merkūm el-Hâc Süleyman Ağa’yı ilzâm eylediğini kâtib-i mezbûr mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği ba‘de’t-tenfîz İstanbul Mahkemesi’nden huzûr-ı âlîlerine i‘lâm olundu. Fî 26 min-Z sene 1242