İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 492 Hüküm no: 441 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Horasima bt. Ohan’ın Beyoğlu’ndaki dükkân kiracısı Nefise bt. Mustafa’nın, haline merhameten dükkândan çıkarılmaması Beyoğlu’nda kahvehâne maddesi Ma‘rûz Mübârek-rikâb-ı kamer-tâb-ı hazret-i hilâfet-penâhîye takdîm olunan işbu arzuhâlde mezkûr mahrûse-i Galata hâricinde Beyoğlu nâm mahâlde Parmakkapı civârında kâin ma‘lûmü’l-hudûd bir bâb vakıf kahvehânenin bi’l-icâreteyn mutasarrıfesi Horasima bt. Ohan nâm Nasrâniye tarafından husûs-ı âtîde vekîl olduğu Ali Ağa b. İsmail ve Mehmed Ağa b. Hasan nâm kimesneler şehâdetleriyle sâbit olan sadrî kebîr oğlu Artin v. Serope nâm zimmî Çarşamba günü Arz Odası’nda huzûr-ı lâmi‘u’n-nûr-ı müşîrânelerinde ma‘kūd meclis-i şer‘-i münîrde sahibe-i arzuhâl mu‘arrefetü’z-zât Nefise bt. Musa nâm hatun muvâcehesinde mezbûre Nefise Hatun kahvehâne-i mezkûrede şehriye altı guruş kirâ ile müste’cire olup lâkin dükkân-ı mezkûrun vâlidem mesfûreye lüzûmu olduğundan gāyet-i şehr-i âtîye izâfetle bi’l-vekâle fesh-i akd-i icâre etmemle dükkân-ı mezkûru tahliye ve müvekkilem mesfûre için bana teslîme mezbûre Nefise Hatun’a tenbîh olunmak bi’l-vekâle matlûbumdur deyü da‘vâ ettikde ol dahi cevâbında kahvehâne-i mezkûre derûnunda mevcûde gedik âlâtı karındaşımdan mevrûs olarak mâlımdır deyip ancak mezbûre Nefise Hatun alîle ve fakīre olup âhar medâr-ı ma‘âşı olmadığı ve karındaşı müteveffâ-yı mezbûr dahi gedik-i mezkûru külliyetli semen ile iştirâ etmiş olduğu ihbâr olunmağla sâye-i merhamet-vâye-i şâhânede ölünceye kadar geçinip kat‘-ı erzâk olunmaması’çün kemâ-kân kahvehâne-i mezkûreden ihrâcına tesâddî etmemesi bâbında şifâhen sâdır olan fermân-ı âlîleri vekîl-i mersûm Artin zimmîye tefhîm olunduğu İstanbul Mahkemesi’nden huzûr. Fî 19 min-Z sene 1242