İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 493 Hüküm no: 442 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çarşı-yı Kebir’deki sırıkçı esnafının yangın havfıyla Çarşı’dan çıkarılıp yerine fincancı esnafının taşındığı Çarşı’da mukaddemâ sırıkçı ve el-yevm tuhafçı dükkânları keşfi Ma‘rûz Sâdır olan fermân-ı âlîlerine imtisâlen zikri câ’î husûsu mahâllinde ba‘de’l-keşf ber-nehc-i şer‘î rü’yet için savb-ı şer‘-i enverden me’zûnen irsâl olunan Kâtib es-Seyyid Salih Afîf Efendi dâ‘îleri [ve] hâssa mi‘mârı hulefâsından Ahmed Mümtaz ve es-Seyyid Mehmed Râşid Halîfeler ile İstanbul’da Çarşı-yı Kebîr’de Nûr-ı Osmânî kurbünde mukaddemâ sırıkçı dükkânları olup el-yevm yerlerine bâ-irâde-i seniyye kârgir tuhafçı mağazaları inşâ ettirilen mahalle varıp huzûr-ı Müslimînde akd-i meclis-i şer‘-i nebevî ettikde fincâncı ve tuhafçı esnâfından ashâb-ı arzuhâl Nişan v. Kigork ve Serkiz v. Manas ve diğer Serkiz v. Andon ve Kigork v. Asador ve İstepan v. Simyon ve Manil v. Atam ve Abraham v. Oseb ve Mardiros v. Artin ve Kirkor v. Avadis ve Krisdosdor v. Kirkor ve Ohannes v. Haçador nâm zimmîler meclis-i <<şer‘-i>> ma‘kūd-ı mezkûrda Astarcı es-Seyyid el-Hâc Mehmed Ağa b. el-Hâc Osman asâleten ve Mehmed Emin b. Mehmed Emin ve Mehmed Şükrü b. Mehmed Tahir ile Emine Hatun ibnetü’l-mezbûr Mehmed Emin taraflarından vekâleti zât-ı mezbûreyi ârifân Abdülgafur Şevket Efendi b. Yâsin ve Mehmed Tahir Efendi b. el-Hâc Ahmed şehâdetleriyle sâbit olan mezbûre Emine’nin zevci Şerbetçi Hüseyin Ağa b. Salih vekâleten ve Dülbendci Kirkor v. Mîrîm-kulu zimmî kezâlik asâleten muvâcehelerinde sûk-ı mezbûrun Nûr-ı Osmânî tarafında olan kapıdan girerken sağ tarafda kâin üç bâb cedîd dükkân gedikleri asîl ve müvekkil-i merkūmûnun olmağla mâ‘adâ dokuz bâb dükkân ile bezzâzistân kapısı derûnunda vâki‘ dört bâb terzi dükkânı gedik mâliklerinden şâhidân-ı merkūmân Şevket Efendi ve Tahir Efendi ve Ali Bey b. el-Hâc Mehmed ile Dülbendci Bogos v. Bedros ve Serkiz v. Vartan ve Oseb v. Manil ve Oseb v. Vartan ve Kirkor v. Atam nâm zimmîler asâleten ve Abraham v. Atam ve Markar v. Mardiros taraflarından vekîl-i şer‘îleri Bogos v. Bedros ve Maryem bt. Atam Nasrâniye tarafından vekîl-i şer‘îsi Avanes v. Bedros ve Horasima bt. Kirkor tarafından vekîl-i şer‘îsi Oseb v. Kigork zimmîler hazır oldukları hâlde Çarşı-yı Kebîr muhterik oldukdan sonra san‘atı keresteye mevkūf olan sınıfın ve ez-her cihet ahşab nev‘inin Çarşı’dan ref‘iyle muhâtaradan tahaffuz esbâbına teşebbüs garazıyla işbu mahâlde olan sırıkçı dükkânları Sultân Mehmed bîmarhânesinde tehyie olunan mahalle nakl ve yerlerine Sultân Bâyezid havlîsinde hedm olunan Kolluk tahtında mütemekkin fincâncı gedikleri nakl sûretiyle kârgir mağazalar inşâ ve derûn-ı çarşıda olan dekâkîn mutasarrıfları fakat cüz’î kirâ-yı kâdimlerini alıp tasarruf ve intifâ‘ gedik ashâbında olduğuna nazaran çarşı kemerlerinin muhterik ve münhedim mahalleri gedik ashâbı taraflarından ta‘mîr ve binâ olunması husûsuna irâde-i aliyye ta‘alluk etmeğin mûcibince işbu sûkun bâlâda zikri sebkat eylediği vechile Nûr-ı Osmânî tarafında olan kapıdan girerken sol tarafda ber-vech-i muharrer fincâncı mağazaları ve sağ tarafında dahi on iki bâb dükkân ve bezzâzistân kapısı derûnunda dört bâb terzi dükkânı olup birinci ve ikinci ve üçüncü dükkânlar külliyen muhterik ve münhedim olmuş olduğundan gerek dükkân ve gerek kemerin ol mertebesi müceddeden binâ ve mâ‘adâları ta‘mîr kabûl etmekle zikrolunan fincâncı mağazalarıyla kemerin mağazalar tarafından nısf-ı masrûfunu kimesneden hiçbir nesne mutâlebe etmeyerek kendi mâlımızdan inşâ ve ta‘mîr etmiş iken mâ‘adâsında dekâkîn-i mezkûre gedik ashâbı tereddüd etmişler ise de muslihûn tavassutuyla kâffe-i ahâlî çarşının mu‘âmeleleri vechile beynimizde uyuşulup tanzîm olunmak üzre beynimiz ıslâh ve te’lîf olunmağla sâlifü’z-zikr üç bâb cedîd dükkânın ber-mûcib-i defter-i keşf-i sahîhi üzre mesârifi olan iki bin sekiz yüz altmış üç guruşu gedik mâlikleri asîl ve müvekkil-i merkūmûn yalnız kendileri ve sâlifü’l-beyân kemerin ta‘mîr mesârifi olan üç bin dört yüz yirmi beş guruş ve mezbele mesârifi olan üç yüz altmış guruş ki cem‘an üç bin yedi yüz seksen beş guruşu mi‘mârân-ı mezbûrân ma‘rifet ve misâhalarıyla her dükkânın yüzü kaç zirâ‘ ise ol vechile taksîm olunarak taraf-ı şer‘den başka başka i‘tâ olunan pusulalar mûciblerince herkes hissesine isâbet edeni ve mârrü’l-beyân kemerin tecdîd ve mesârifi olan beş bin üç yüz elli guruşun dahi sülüsünü fincâncı esnâfı ve sülüs-i diğerini üç bâb cedîd dükkân sahibleri ve sülüs-i âharını dahi dokuz bâb dükkân sahibleriyle bezzâzistân kapısı zukāğı içinde olan dört bâb terzi dükkânı sahibleri edâ etmek üzre cümlemizin rızâ ve ittifâkıyla tanzîm olunup külliyen kat‘-ı nizâ‘ eyledik deyü bi’l-asâle ve bi’l-vekâle takrîr ve tasâdukları ba‘de’l-inhâ İstanbul Mahkemesi’nden huzûr-ı âlîlerine i‘lâm olundu. Fî 17 min-Z sene 1242