İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 495 Hüküm no: 443 Orijinal metin no: [83b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 1826 baş sığır dağıtımının yapıldığı 1826 re’s sığır tevzî‘i Ma‘rûz Âsitâne-i aliyye -sânehallâhu te‘âlâ ani’l-âfât ve’l-beliye-’de sâkin ibâdullâh için işbu sene-i mübârekede sığır sevk ve tesyîr eden sürek çelebi [celebi] tâifesinden bu def‘a yüz kırk altı re’s sığır sahibi Yedikuleli Kasab Emin Ağa ve iki yüz altmış re’s sığır sahibi Kasımpaşalı Ârif Ağa ve yüz yirmi re’s sığır sahibi Avratalanlı Naşo zimmî ve iki yüz altmış re’s sığır sahibi Göncü oğlu Yahûdî ve yüz elli re’s sığır sahibi Bergoslu Andriya zimmî ve yüz altmış re’s sığır sahibi Kostantin zimmî ve yüz on re’s sığır sahibi Seyfi oğlu Mehmed ve iki yüz kırk re’s sığır sahibi Petko zimmî ve iki yüz altmış re’s sığır sahibi Mu‘âmeleci <> oğlu Tanaş zimmî ve yüz yirmi re’s sığır sahibi Çorlulu Yasef zimmîden her biri meclis-i şer‘-i enverde sığır kasabları kethudâsı el-Hâc İbrahim Ağa muvâcehesinde sığır kasabları ustalarından el-Hâc Derviş Mehmed Ağa ve İsmail Ağa ve Osman ve Galatalı Hasan ve Tophâneli Salih ve Emir Ali ve Mercanlı Hüseyin nâm kimesneler ile ve Beşiktaş[lı] Milo zimmî ve Yahûdî tâifesinden Mosi [84a] ve Hasköylü Lefteri ve Semriyo Yahûdiler hazır oldukları hâlde işbu sene-i mübârekede Rumeli cânibinde vâki‘ zikrolunan mahallerden her birimiz ber-vech-i muharrer müteferrikan Âsitâne-i aliyyeye sevk ve tesyîr eylediğimiz cem‘an bin sekiz yüz yirmi altı re’s sığırlarımızın lühûmunun beher vakıyyesini lahm-ı ganemin râyic fiyâtının sülüsânına ve iç yağının beher vakıyyesini elli beşer buçuk akçeye ve sakatlarını ellişer paraya sığır kasabları mezbûrûna bey‘a ta‘ahhüd eylediğimizde onlar dahi ber-vech-i muharrer şirâya ve haftada birer sürek ve yevm-i tevzî‘inden kırk bir gün tamamında mikdâr ve fiyâtını mübeyyin yaftalarımızı yedlerimize vermek ve altmış bir günde haklaşmak üzre kethudâ-yı merkūm ve lühûmunun beher vakıyyesini altışar akçe ticâret zammıyla narh-ı cârîsi üzre ibâdullâha bey‘a esnâf-ı hâzırûn-ı merkūmûn ta‘ahhüd eylediler deyü tarafeynin takrîr ve tasdîkleri tescîl ve İstanbul Mahkemesi’nden huzûr. Fî 16 min-Z sene 1242