Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 385 Hüküm no: 444 Orijinal metin no: [70b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ehl-i örf taifesinden Ebûbekir b. Hızır’ın Mehmed b. Sefer’den haksız yere aldığı parayı ödemesi Vilâyet-i Anadolu’da Bolu sancağında Dörtdîvân kazâsına tâbi‘ Yakakayığı nâm karye sükkânından işbu bâ‘isü’l-kitâb Mehmed b. Sefer meclis-i şer‘-i şerîf-i enverde Ebûbekir b. Hızır nâm kimesne mahzarında üzerine da‘vâ ve takrîr-i kelâm edip [71a] mezbûr Ebûbekir Bolu mütesellimi olan Ali Ağa’nın etbâ‘ından olmağla bir ay mukaddem karye-i mezbûreye gelip beni haps edip karındaşın Ali avrat yoluna inmiş deyû bi gayri hakkın otuz guruşum ahz u kabz etmeğin suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Mehmed [cevâbında] fi’l-hakīka bâlâda ketb ve terkīm olunan minvâl üzre müdde‘î-i mezbûrdan otuz esedî guruş ahz u kabz edip ol vechile meblağ-ı mezbûru müdde‘î-i mezbûra red ve teslîm lâzım geldiğini ikrâr ve i‘tirâf etmeğin alâ mûcebi i‘tirâfihî meblağ-ı mezbûr otuz guruşu müdde‘î-i mezbûra red ve teslîm mezkûr Ebûbekir’e tenbîh olunup mâ vaka‘a bi’t-taleb ketb olundu. Fi’l-yevmi’s-sâbi‘ min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed, Mustafa b. Abdurrahman, İbrahim Çelebi b. Ahmed, Mehmed b. İdris.