İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 495 Hüküm no: 444 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır tüccarından Davud b. Hüseyin ile ortağının, Tunus tüccarı Mustafa Ağa b. Mehmed’e 2409 guruş ödemesi gerektiği 2409 guruş hüküm Ma‘rûz Tunus tüccârından İzmirî Mustafa Ağa b. Mehmed nâm kimesne meclis-i şer‘-i münîrde Mısır tüccârından İskenderânî es-Seyyid Davud b. es-Seyyid Hüseyin ve şerîki İskenderânî Mehmed Şemsi b. el-Hâc Mehmed nâm kimesneler muvâcehelerinde şerîkân-ı mezbûrân es-Seyyid Davud ve Mehmed Şemsi zimmetlerinde yedimde olup işbu sene-i mübâreke Şa‘bâni’l-mu‘azzamı gurresi târihiyle müverrah bir kıt‘a temessük mantûkunca mâlımdan ve yedimden bi’l-ma‘iyye iştirâken iştirâ ve kabz eyledikleri ma‘lûmü’l-vezn ve’l-fiyât tütün semeninden gayrı-ez teslîmât sahhu’l-bâkī beş bin dokuz yüz altmış guruş alacak hakkımın bir def‘a bin guruş ve bir def‘a altı yüz guruş ki cem‘an iki def‘ada bin altı yüz guruşunu şerîkân-ı mezbûrân mukaddemâ bana edâ ve teslîm etmeleriyle bâkīsi olan dört bin üç yüz altmış guruşu şerîkân-ı merkūmân es-Seyyid Davud ve Mehmed Şemsi’den hâlâ taleb ederim deyü da‘vâ ettikde onlar dahi cevâblarında müdde‘î-i mezbûr Mustafa Ağa’ya tütün semeninden bâkī meblağ-ı mezkûr beş bin dokuz yüz altmış guruş zimmetlerinde sahîhan deynleri olduklarını ikrâr lâkin biz müdde‘î-i mezbûrun iki def‘ada ber-vech-i muharrer kabzını mu‘terif olduğu meblağ-ı mecmû‘-ı merkūm bin altı yüz guruşdan mâ‘adâ bir def‘a bin yüz elli bir guruş ve bir def‘a sekiz yüz guruş ki iki def‘ada cem‘an bin dokuz yüz elli bir guruş dahi teslîm etmemizle müdde‘î-i merkūma zimmetimizde ancak iki bin dört yüz dokuz guruş deynimiz bâkī kalıp hatta müdde‘î-i mezbûr Mustafa Ağa iki def‘ada cem‘an bin dokuz yüz elli bir guruşu dahi vech-i muharrer üzre bizden ahzını şehr-i sâbık Zilka‘detü’ş-şerîfesinin yirmi <> ikinci günü İstanbul’da Tahte’l-kal‘a’da vâki‘ hân derûnunda mahzar-ı şühûdda ikrâr dahi etmişdi deyü müdde‘î-i mezbûrun inkârına mukārin def‘ makāmında eylediği ikrâr-ı meşrûh müdde‘âsını her biri mahallerinde lede’t-tezkiye adl ve makbûlü’ş-şehâde idükleri ihbâr olunan İbrahim b. Mehmed el-Buhârî ve Kundakçı Hânı’nda sâkin Bedreddin b. Ahmed Hanayî? nâm kimesneler şehâdetleriyle bi’l-muvâcehe vech-i şer‘î üzre isbât etmeğin mûcibince meblağ-ı mecmû‘-ı mezkûr bin dokuz yüz elli bir guruş dahi deyn-i meblağ-ı bâkī-i merkūm dört bin üç yüz altmış guruşdan lede’t-tenzîl bâkīsi olup şerîkân-ı mezbûrânın sâlifü’l-beyân ikrârlarıyla lâzım gelen meblağ-ı mezkûr iki bin dört yüz dokuz guruşun müdde‘î-i merkūm Mustafa Ağa’ya edâ ve teslîmleriyle şerîkân-ı mezbûrân es-Seyyid Davud ve Mehmed Şemsi’den her biri ilzâm olundukları mübâşirleri Bâb-ı Âsafî kavaslarından Şerif Kavas kullarıyla huzûr. Fî 23 min-Z sene 1242