İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 496 Hüküm no: 445 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erzurumlu Mehmed’in defnine izin verildiği Keşf-i meyyit Ma‘rûz Lisânen sâdır olan fermân-ı âlîlerine imtisâlen zikri âtî meyyitin keşfi’çün kıbel-i şer‘den mürsel Kâtib es-Seyyid Ahmed Efendi dâ‘îleri İstanbul’da Sultân Bâyezid kurbünde Sekbânbaşı Yakub Ağa mahallesinde Hasan Paşa Hânı civârında hamam karşısında kâin Berber Mustafa ve Osman nâm kimesnelerin dükkânlarında meyyit bulunan fi’l-asl Erzurum ahâlîsinden ve İstanbul’da Taş Kasap kurbünde Sarı Musa mahallesi sâkinlerinden Odunkapısı’nda gümrük dîdebânı uzun boylu ak sakallı Mehmed nâm müteveffânın cebbânesi üzerine varıp müteveffâ-yı mezbûrun dâmadı Cihangirli İsmail b. Yusuf ve mahalle-i mezbûre imâmı es-Seyyid Mehmed Efendi <> ve mahâll-i mezkûrda vâki‘ dekâkîn ashâbından Dikici es-Seyyid Ömer b. Hasan ve Helvâcı Halil b. Abdullah ve sâirleri hazır oldukları hâlde a‘zâsına nazar ettikde eser-i cerh ve hankdan kat‘a nesne olmayıp koynunda kîsesi derûnunda kırk para ve bir altmışlık ve bir aynalı enfiye kutusu ve bir Fransa sâ‘ati mevcûd bulunmağla meclis-i şer‘de dâmadı merkūm İsmail’e ba‘de’t-teslîm keyfiyet-i fevtini suâl ettikde merkūm Mehmed işbu târih-i i‘lâm günü Dîvânyolu’nda giderken kahve-i mezkûreye girip oturduğu hâlde füc’eten vefât eylediğini hâzırûn-ı merkūm[ûn] ihbâr etmeleriyle müteveffâ-yı mezbûru defne izin verildiğini mezbûr dâ‘îleri mahâllinde tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ eylediği İstanbul Mahkemesi’nden huzûr. Fî 11 min-Z sene 1242